Emakumez bete nahi du Ahotsak-ek Euskalduna Jauregia biharko ekitaldian
Ahotsak ekimenak ekitaldi erraldoia antolatu du biharko Bilboko Euskalduna Jauregian, 11.30ean hasita ordubete inguru iraungo duena. Biharko ekitaldi zabal hori «bakea atzeraezina izan dadin beste pauso bat» izatea nahi du eta, asmo horrekin, Euskal Herriko emakume guztiei parte hartzeko dei egin diete antolatzaileek. Atzerriko ordezkari ugari ere bertan izango dira. Ekitaldi politi- koaz gain, jolasteko jardueretarako parada izango da, «ezusteko» eta guzti.
BILBO
Bihar ekitaldi erraldoia egingo du Ahotsak ekimenak Euskalduna Jauregian eta bertan parte hartzeko dei egin die Euskal Herriko emakume guztiei, «guztiak beharrezkoak» direlako. Orotara, 3.000 emakume inguru biltzea espero dute. «Ekitaldia bakea atzeraezina izan dadin beste pauso bat izatea lortu nahi dugu», nabarmendu zuten.Ekimen horrek egindako ekarpenak milaka atxikimendu eskuratu ditu dagoeneko eta, oraindik egin ez duenak sinatzeko aukera izango du biharko ekitaldian, sartu bezain laster horretarako jarrita egongo den mahaian. Izan ere, babes hori guztia irudikatzea eta elkarrekin lanean hastea da ekitaldiaren helburuetako bat. Baina Euskalduna Jauregian ez dira bakarrik Euskal Herriko emakumeak egongo. Bes- teak beste, Galiziatik eta Kataluniatik ere etorriko dira. Ordezkaritza zabala izango da, gainera. Kataluniatik, adibidez, CiU, ERC, PSC eta ICV alderdietako ordezkariak izango dira Bilbon. Europako Legelbitzarreko Emakumeen Eskubideen Batzordeko kideak ere izango dira gurean. 2004. urtean Bakearen Nobel saria jaso zuen Wangari Mathai emakume afrikarraren hitzak ere Euskalduna Jauregian entzungo dira, konponbidea lortzeko elkarrizketaren alde egiten, hain zuzen. Biharko ekitaldian dokumentu berri bat aurkeztuko dute, emakumeak prozesuan parte hartzeko premiei buruzko hausnarketan sakontzeko. Aurre- rago alderdi politikoei helarazteko asmoa du Ahotsak eki- menak. Baina dena ez da politika izango biharko ekitaldian, jakina: bertsolariek, dantzariek, clown batek, antzerki talde batek eta Euskaldunako organoa joko duen musikariak ere beren lekua izango dute biharko ekitaldian, dena beren atxikimendua eman duten emaku- meek egindakoa izango da. Beraz, konpromisoa adierazteaz gain, ondo pasatzeko aukera ere izango dute bihar Euskalduna Jauregira bertaratzen direnek.
|
