BAIONA

Derbi beroa izatea espero da gaur Baionan. Berez bi talde horien arteko neurketak horrela izaten dira, bientzat baitira elkarren aurkako bi partidak urteko garrantzitsuenetakoak, baina aurten sailkapeneko egoera gehitu behar zaio horri.

Biarritz ongi dabil, helburuen barruan, baina ez dabil, ordea, zaleek nahi zuten jokoa egiten. Erregulartasuna falta zaio. Tarteka partida onak ere eskaini ditu, baina txarrak gehiago izan dira. Ohikoak diren baino partida gehiago ere galdu ditu, izan ere, etxetik at garaipenak lortzea asko ari baitzaio kostatzen. Hori guztia amaitzeko lekurik aproposena Baiona dela uste dute biarriztarrek.

Aviron, ordea, ez dago ezer alferrik galtzekotan. Sailkapeneko azkeneko postuan dago. Hori bai, Ligako azken hiru neurketak irabazi ditu, eta horrek salbaziotik oso gertu jarri du, hiru puntura baitu salbazioa, eta ez da ahaztu behar garaipenak berak balio dituela lau puntu. Beraz, litekeena da jardunaldi honen amaieran jaitsierako postuetatik ihes egitea. Horretarako, Biarritz menderatu beharra dauka, eta gainerako emaitzen zain egon beharko du. Galtzen badu, berriz, ez dauka inoren zain egon beharrik, beste zelaietan gertatzen dena gertatu, sailkapeneko azkeneko muturrean jarraitu beharko baitu.

Punturik gutxien jaso duen taldea, eta beraz, Ligako defentsarik onena duen Biarritzek aurrez aurre izango du Ligan punturik gehien jaso duen eta defentsarik txarrena duen taldea. Hala ere, Avironek azkeneko partidetan atzealdean sendotasuna erakutsi du, eta hortik etorri dira emaitza onak ere.

Biarritz gaur egun sailkapeneko hirugarren postuan dago, 43 punturekin. Jokatu dituen 15 partidetatik 9 irabazi ditu, eta 6 galdu. Guztira 348 puntu egitea lortu du, eta 228 jaso ditu. 7 puntu gehigarri ere batu ahal izan ditu, guztiak ere erasokoak. Aviron hamalaugarren dago, azkeneko postuan, 25 punturekin. 6 partida irabazi ditu, eta 9 galdu. Guztira 235 puntu egin ditu, eta 369 jaso. Puntu gehigarri bat ere lortu du, eta bera erasokoa izan da.

Nuñez Piosseken lesioa

Avironeko berririk txarrena atzo jakin zen, Nuñez Piossek argentinarrak belauneko lotailu gurutzatuak apurtuta baititu, eta hala, denboraldia amaitu du. Argentinako selekzioarekin hartu zuen min, eta atzo egin zizkioten probetan lesio larri hori agertu da. Berarekin batera, Vermis, Fraser, eta Bernard ere ez dira arituko. Thierry, Tomuli, Laurent, Baget, Deen, eta Pez berriz, osatu dira, eta deialdian daude.

Biarritzen Avril, Gaitan eta Thion dira jokatuko ez dutenak. Ez dago azken ordura arte jakiterik Harinordokik jokatuko duen. Selekzio ezberdinetan aritutakoak ere itzuli dira, baina ez dute denek jokatuko.