KITMAR 22
SPYRO BERA BERA 6
ORDIZIA
Kitmar Ordiziak irabazi zuen atzo Trevijanon jokatu zen gipuzkoarren arteko derbia. Goierritarrak dezente gehiago izan ziren, eta ongi merezitako garaipena lortu zuten.Neurketa ez zen ikusgarria izan. Bi taldeek errespetu handiarekin ekin zioten norgehiagokari, baina lehen minutuetan donostiarrena zen baloiaren jabetza, eta estreinako minutu horiek ordiziarren zelaian jokatu ziren.
Apurka-apurka, ordea, etxeko taldea presio hori kentzen joan zen, eta hamalaugarren minutuan Villa argentinarrak aurreratu zituen urdinak zigor-kolpe bati esker. Hortik aurrera ere etxekoek jarraitu zuten nagusi izaten, baina entseguak egiteko ia aukerarik ez zuten egiten. Horrelakoetan gertatzen den moduan, ostikoek erabakitzen dituzte neurketak, eta Villak beste hiru jarraian gauzatu zituen. Hala, 12-0 aitzineratu ziren 32. minutuan.
Bera Berak ere nahi zuen, eta markagailua murrizteko modua egin zuen atsedenera joan aurretik, Buenok lortutako zigor bati esker. Bazirudien 12-3koarekin joango zirela atseden hartzera, baina azkeneko jokaldian Oskar Astarloak entsegua egin zuen ordiziarrentzat, eta Villak transformatu egin zuen.
Bigarren zatia hasi eta berehala Buenok beste zigor bat egin zuen, eta emaitza murriztu zuen (19-6). Hamahirugarren minutuan, Ordizia jokalari bat gutxiagorekin geratu zen, Isasik aurkari bati ukabilkada eman baitzion, eta epaileak txartel gorria erakutsi zion.
Spyro Bera Berak bazuen denbora, jokalari bat gehiago zuen, baina ez zuen ezer egin. Ordiziak markagailua alde zuenez, atzean eutsi nahi izan zion, baina donostiarrek ez zuten ezer egin. Gainera, Villak beste zigor bat lortu zuen, eta aldea handitu egin zuen etxekoen alde. Hala, partida erabakita gelditu zen.
