«Acto para la Noche Buena» taularatuko dute
ARRASATE
Arrasateko Doke antzerki taldeak antzeztokietara eramango du, abenduaren 16an eta 17an Arrasaten eta 23an Aramaion, Pedro Ignacio de Barrutia aramaioar-arrasatearrak XVIII. mendean idatzitako “Acto para la Noche Buena” obra sonatua. Oraingo hau da arrasatear talde batek Barrutiaren antzezlana ekoizten duen lehenengo aldia.“Acto para la Noche Buena” Arrasaten emateko idatzi zuen Aramaion 1682an jaiotako egileak. Eta obra hori da Hego Euskal Herrian euskaraz ezagutzen den lehen antzerkia. Oso gutxitan antzeztu dute, eta XX. mendean bina aldiz bakarrik taularatu zuten Arrasaten eta Aramaion. Doke antzerki taldeak abenduren 16an eta 17an aurkeztuko du obra Arrasateko Amaya antzokian, eta 23an, Aramaioko kultura etxean. Taldekideen asmoa da beste zenbait herritara ere eramatea. Doke taldea duela urte bi sortu zuten, “Eskuak elkarri” antzezpen musikatuaren ingurura bildutako zenbait lagunen ekimenez. Eta urtebete daramate bigarren obra hau prestatzen, Gasteizko Itziar Rekalde zuzendariarekin. Kideentzat oso erronka handia gertatu da, gehienak ia-ia zerotik abiatzen baitziren euren antzerki formazioari dagokionez. Ekoizpen horretarako obrak eskatzen duen musika berezia enkargatu behar izan dute Dokekoek, eta lan horretan Sabin Salaberri aramaioarrak lagundu du, bera baita abestien egilea. Doke antzerki taldeak Arrasateko Udalaren babesa izan du lehen unetik, eta Aramaioko Udalak ere modu berezian lagundu du. Doke taldeak, bestalde, telebistarako ekoizpenaren ardura ere hartu du bere gain, eta horrela taldekideen esku geratzen da telebista formatuan, DVDn edo beste euskarrietan eskaintzeko eskubidea.
|
