DONOSTIA
Antonio Cañizares Toledoko kardinal artzapezpikuak Euskal Herriko egoeraren gainean «Elizaren benetako ahots bakarra» Gotzain Konferentziak bere pastolaren bitartez zabaltzen duena dela ohartarazi zuen atzo Cope irrati katean. Arantzazuko frantziskotarrek urrian argitaratutako aldizkariko artikulu bati erantzuteko xedea zuten adierazpen horiek.Arantzazuko frantziskotarrek «Normalizazioa askatasunean» izenburuko artikuluan adierazten dute Euskal Herriak bizi duen gatazka politikoa «ezin dela ETAk eragiten duen indarkeria armatura murriztu». Hain justu, Euskal Herriaren normalizazioa «Euskal Herriaren eta Estatu espainolaren arteko harreman politiko eta juridiko berri baten lorpenean» oinarritzen dela adierazten dute. Gainera, «euskal herritarren gehiengoak babestu beharko duen harreman berri honek ekintza politiko eta soziala ahalbidetuko duen marko justua» izan behar duela gehitu dute Arantzazuko frantziskotarrek urrian haien aldizkarian argitaratutako artikuluan.
Toledoko artzapezpikuak «Espainiako batasuna apurtzeko arrazoi zilegirik ez» dagoela azaldu zuen Cope irrati katean egindako adierazpenetan. Gainera, Estatu espainoleko batasuna «herri guztien oinarrizko onura komuna» dela adierazi zuen Cañizaresek.
Artzapezpiku horren aburuz, «Espainia osatzen duten herri guztiek Espainiako osotasunari zor diote egun izatera iritsi direna». Frantziskotarren artikuluari erantzunez, banakuntza baten atarian «Espainiako nazio lurralde osoko herritar guztiek erabaki behar» dutela adierazi zuen; frantziskotarrek, aldiz, banakuntzaren erabakiak eragiten dituen herritarrek bakarrik erabaki behar dutela diote haien artikuluan.
Toledoko artzapezpikuak banakuntza Estatu espainoleko «nazio lurraldeko zati batek bakarrik erabakitzea zilegia» dela adierazi badu ere, «moralaren kontrakoa» dela deritzo. «Espainiako errealitateak osatzen duen batasun historiko eta kulturalak dakarren onura komuna errespetatzen ez» duela uste baitu Cañizaresek.
Bestetik, Bizkaiko hainbat elizak bakearen aldeko ekimen bat egingo dute otsailaren 3an, «Zure pausoa bakerako hauspoa» lelopean. Bakearen aldeko mezua irakurriko dute bertan.
