GASTEIZ
Eibar-Gasteiz autobideko lanak azken txanpan sartu dira. Ez alferrik, Bidegik 2008 urte hasierarako autobidea bere luzera osoan irekita egongo dela espero du. Atzo, Gipuzkoako Azpiegituren Agentziak nabarmendutakoaren arabera, urrats garrantzitsua egin zuten lan horietan Isuzkitzako tunela zulatuta.Tunel bikoitz horren hodi bakoitzak 3.377 metro ditu eta, hartara, Arabako, Bizkaiko eta Gipuzkoako tunelik luzeena da. 2004ko irailean hasi ziren Gipuzkoa eta Araba lotzen dituen tunela egiten; AP-1 autobidearen Eskoriatza-Isuzkitza zatia egiten hasi zirenean, hain zuzen. Bidegik nabarmendu duenez, zulatzeko «giza eta teknika baliabide konplexuak» erabili behar izan dituzte. «Leherketa kontrolatuak egin dituztenez, kualifikazio handieneko aditu talde bat aritu da lanean, hiru txanda egunean eta zazpi egun astean», esan du. Lan-prozesua «neketsua» izan dela eta lansaio bakoitzean «metro gutxi batzuk» zulatu ahal izan dituztela ere adierazi du Bidegik.
Erabat zulatuta dago ezkerreko aldea, autobidearen Gasteizerako norabidekoa. Baina beste aldea zulatzeko 200 bat metro falta dira eta datozen asteotan amaituko dira bi ertzok elkartzeko lanak, Bidegik aurrez ikusitakoaren arabera.
Behin lan horiek amaituta, «tresneria tekniko modernoena» jarriko dute bertan; hala nola, 61 kontrol kamera, mezu aldagarriko 60 panel, 216 bozgorailu, 48 haizagailu eta 55 SOS zutoin.
Eibar-Gasteiz autobidearen Gipuzkoako zatiaren erdia irekita dago, Eibar-Arrasate artean. Beste zatia 16 kilometrokoa Arrasate eta Isuzkitza artekoa da eta bukatu gabe dago. 500 bat langile ari dira lanean, eta 2008 urte hasierarako bukatuta egotea espero dute.
