GASTEIZ
Gamesak lau parke eoliko saldu dizkio Babcock & Bronwn taldeari Estatu Batuetan. Joan den azaroaren 23an iragarri zuten operazioa 266 milioi euroan itxi dute.
Enpresak atzo aditzera eman zuenez, akordioa Federal Energy Regulation Commission elkartearen baimena lortu ondoren egin dute. Gamesak instalazio horiek dituzten enpresetan akzioak zituen eta horiexek erosi dizkio, hain zuzen ere, Babcock & Brown enpresak. Instalazio guztien potentzia 232,6 megawattekoa da.
Aipaturiko parke eolikoak Pennsylvania estatuko Cambria eta Blair konderrietan eta Illinoiseko Lee konderrian daude.
Gasteizen egoitza nagusia duen enpresa horrek jakinarazi duenez, operazio horren bitartez bere egoera sendotzen du Estatu Batuetako merkatuan. Izan ere, lurralde horri lehentasuna eman dio Gamesak nazioartean egin nahi duen zabaltze prozesuaren barruan.
