BAIONA

Abenduaren 23an jokatu zuen azkeneko neurketa, Ligakoa, Les Herbiersen aurka, eta 2-1 irabazi ostean, oporrak izan zituzten jokalariek abenduaren 29ra bitarte. Egun horretan lan saio bat izan zuten, baina 30ean bi izan zituzten, eta bat berrio ere 31n. Urteberri egunean jai izan zuten, eta atzo berriro ere Alain Pochaten esanetara aritu ziren igandeko partidari begira.

Gaur ere arratsaldez izango dute lan saioa, baina gainerako asteetan ere osteguna izaten dute asteko jaiegun bakarra, eta aste honetan ere horrela izango da. Ostiral arratsaldean ere azken-aurreko lan saioa izango dute, eta larunbat eguerdian azkenekoa. Horren ostean ezagutaraziko du AlainPochatek Lyonen aurkako partidarako deialdia, eta ondoren deitutakoak Baionako hotel batean bilduko dira partidako ordua heldu bitarte.

Jokalariei dagokienez, une honetan egongo ez diren bakarrak Philippe Lalane eta Sautier dira. Zuri-urdinen atzelariak belauneko lotailu gurutzatuak apurtuta ditu, eta ez du aurten gehiago jokatzerik izango. Sautierrek, berriz, Les Herbiersen aurka hartu zuen min. Ez du Lalanek duen bezain lesio larria, baina ez du Lyonen aurka jokatzerik izango.

Beste batzuk, ordea, zalantzan daude. Estrade, El Hajjam eta Balde dira. Hirurak ere entrenatzen ari dira, baina ez daude ehuneko ehunean, nahiz eta igande arratsalderako erabat osatuta egotea espero duten.

Lyoni dagokionez, atzo itzuli ziren entrenamenduetara, Gabonetako oporrak pasatu ostean. Orain igande arte izango dute neurketa prestatzeko aukera, nahiz eta asteko azkeneko lan saioa larunbatean egingo duten. Larunbat arratsaldean Euskal Herrian izatea espero da.

Sarrerak salgai