- Aizkora
Olasagastik min hartu du berriro, saihetsean oraingoan
DONOSTIA
Joan den abenduko San Tomas egunean Azpeitiko plazan izandako istripuaren ondoren osatuta zegoenean, Joxemari Olasagastik min hartu du berriro. Etxean erori da eta saihetsean du lesioa oraingoan, eta bi edo hiru egunez erabat geldirik egotea gomendatu dio medikuak. Horrenbestez, urtarrilean lehiaketara itzultzea pentsatua bazuen ere, aurreikuspen hori kolokan dago erorikoaren ondorioz.
Igeldokoak Urrezko Aizkolarien Binakako Txapelketako B multzoko ligaxkako saioan parte hartzeko asmoa zuen, Gautegiz Artea- gan, baina ziur asko ez da hitzordura iritsiko. Peñagarikanorekin batera aritzekoa zen, Floren Nazabal eta Juan Joxe Azpilikuetak osatutako bikotearen aurka. Multzoko lehen postuak egon behar zuen jokoan. Izan ere, Miel Mindegia eta Antonio Senosian kanporatu dituzte, lehenengoa min hartuta baitago.
Alde horretatik, nabarmentzekoa da Miel Mindegia ere ez dela osatu. Ezkurrako aizkolariak adierazi zuen bere osatze prozesua motel doala.
|
