Juan Carlos Irizarren, Ana Centenoren eta Mertxe Merinoren ekimena da ``Txilipristin''. Irizar aita denez, eta andereño biak hezitzaile direnez, umeekin jarduteko material berrien beharra sumatu izan dute, eta horri erantzuteko asmoarekin ekin zioten proiektu horri.

«Guraso izanik, banuen, bada, halako proiektu batean inplikatzeko gogoa. Banekien andereño hauek umeekin aritzeko material gehiagoren beharra zutela eta prest zeudela horren alde lanean jarduteko. Elkartu ginen eta ideia hau suertatu zen», azaldu dio Irizarrek GARAri.

Duela bi urte jarri ziren martxan. Emaitza 31 abesti biltzen dituen diskoa eta Jon Joseba Aizpuruak idatziriko ipuin sorta dira. CD eta ipuinak batu eta liburu itxurarekin merkaturatu dute. Haurren hizkerara hurbildu dira, eta Urola Kostan erabiltzen duten hitz bat hautatu dute izenbururako: txilipristin. «Txikiekin gozatzeko pentsatua dagoenez, egokia iruditu zitzaigun hitz hau gure lanaren izenbururako», adierazi du.

CDak lau atal ditu: jolasteko kantak, jaten laguntzekoak, lotarakoak eta herriko abestiak. Ana Centeno eta Mertxe Merino arduratu dira dokumentazioaz eta entzuten diren piezen hautaketaz. Azterketa sakona egin dute, Aita Donostia eta Resurreccion Maria Azkue egileek utzitako ondarea kontuan hartuta. «Haiek egin zutena ahaztu ez dadin nahi dugu, umeen artean ezagutzera eman, gaurko umeek ez dutelako haien berri. Gure kultura aberasten jarraitzeko modu bat da», esan du Irizarrek.

Pieza horiek berritzea, moldaketak egitea eta jatorrizko musika sortzea izan da musikagile gipuzkoarraren lana. «Baziren erritmo ezagun zenbait, EuskalHerriko jakintzatik hartuak asko, musikarik gabekoak; horiei musika jarri diet», azaldu du.

Haurrak kontuan hartuta sortutako doinuak dira, erraz eta laburrak, xume eta alaiak.

Hainbat abesti haurrek abestu dituzte, bakarlari gisa edo helduekin batera.

Martinez de Lezearekin

Pieza bakoitzaren jatorria modu argian adierazita dago. Gainera, Toti Martinez de Lezea idazleak sarrera bat egin dio atal bakoitzari; alegia, jolasteko, jaten laguntzeko, lotarako edo herri abestiak zeintzuk diren azaltzen du egile arabarrak. Disko-liburuaren aitzinsolasa ere Toti Martinez de Lezeak berak sinatzen du.

Jon Joseba Aizpuruak, bestetik, umeei kontatzeko istorio laburrak idatzi ditu. Disko-liburu horretarako espresuki egindakoak dira 29 ipuinak.

Gurasoek umeei kontatzeko istorioak dira. 0 eta 10 urte bitarteko haurrei zuzendutakoak. Zaharrenek, 6 eta 10 urtekoek, irakurtzeko moduko testuak aurkituko dituzte Aizpuruaren proposamenean.

``Txilipristin'' ilustrazio biziz atonduta dator. Umeek berek egindakoak dira irudiak. «Urte batetik 10 urtetara bitartekoek marraztutakoak dira; kolore handiko lanak dira», azaldu du. Nagusiek gaiarekin lotutako margoak sortu dituzte.

Irizar oso gustura lotu zaio lan horri, eta badu buruan antzeko beste proiektu bat.