«Egia da eragileoi dagokigula, eta ez beste inori, gure artean dugun zatiketa gainditu ahal izateko urratsak egitea. Halere, eragileon gaurko ezintasuna ikusita, uste dugu Aberri Egunerako ekimen honek euskal jendearen batasun nahia adierazteko eta euskal naziotasuna, lurraldetasuna eta etorkizuna gure esku hartzeko eskubidea eta borondatea aldarrikatzeko balio dezakeela», azaldu zuen atzo ELAk.

Sindikatu abertzalearen batzorde eragileak begi onez ikusi du kultura, kirol, gizarte eta politika arloko ordezkari ugarik heldu den iganderako deitutako ekitaldia. «Zazpiak bat. Nazioa gara. Etorkizuna gure esku» lelopean Bidasoa ibaiaren bi aldeak lotzea da asmoa, eta ELAk berebiziko garrantzia ematen dio ospakizun horren batasun nahiari. Horregatik bidaliko du Nazio Batzordearen ordezkaritza Irundik Hendaiarako ibilbidea egitera, militanteak bestan parte hartzera animatzeaz gain.

ELAk bezala, Euskaria Fundazioak ere idatzi bat igorri zuen komunikabideetara, berak ere Aberri Eguna Bidasoa ibaiaren altzoan ospatuko duela jakinarazteko eta herritarrek osatutako «Zazpiak bat» taldeari babesa ematen diola adierazteko.

«Aspaldian atxikimendu gehien lortu duen Aberri Eguneko ekitaldia dugu datorren igandean Irundik Hendaiara joango den ibilaldia. Eta guk, abertzale guztion elkarlana bultzatzen dugun taldea izanik, babes osoa eman behar zaiola uste dugu», erran zuen Euskariak.

Une erabakigarria

Oraingo honetan euskal gatazkak dituen adierazpen bortitz guztiei bukaera emateko aukera sendoa dagoela pentsatzen du eta xede hori lortzeko lanean dihardu buru-belarri. «Egungo marko juridiko-politikoaren amaieraren atarian gauden honetan, ezinbestekoa dugu Euskal Herriaren nazio izaera onartzen dugun guztion arteko elkarlana eta akordio politikoa», ohartarazi zuen.

Maltzagako ekimena, Ficobako deialdia eta bertze hainbat egitasmo babestu nahi ditu fundazioak. Herritarrak mugiarazten saiatuko da, «prozesu demokratikoek parte-hartzea izan behar dutelako oinarri».

Igande goizeko hamaika eta erdietarako paratua dago hitzordua Ficoban, eta Euskaria han izanen da. Maltzagako Aldarria ezagutarazteko eta atxikimendu gehiago lortzeko aprobetxatuko du aukera, gainera. Joan den abenduaren 30ean testua plazaratu zutenetik, lehenbiziko aldiz bilduko dituzte sinadurak kalean, orain arteko 443 lagunen atxikimenduak harreman pertsonalen bitartez lortu baitituzte.

ESAIT eta Bai Euskal Herriari ekimenetako lagunek ere poza adierazi zuten: «Aberri Egunaren ospakizuna gerturatzen ari den honetan, aspaldiko partez, herritar talde batek sentsibilitate ezberdinak bilduko dituen deialdi bateratua egin du».

«Aurten, herri bezala, bere etorkizuna eskuetan hartzeko determinazioa duen nazio gisa, Aberri Eguna ospatzeko deia egin nahi diogu euskal jendarteari. Horregatik animatzen dugu jendea ikurrina kalera ateratzera. Apirilaren 8an etxe, plaza, kale eta mendietara ikurrina eramateko deia egiten dugu, bai eta Irundik Hendaiara eginen den herri martxan parte hartzeko ere», erran zuten Bai Euskal Herriari eta ESAIT taldeetako ordezkariek.

«Datorren apirilaren 8an Bidasoa ibaiari bultza egingo diogu, Euskal Herria nazioa dela dioen aldarria Kantauri itsaso luze-zabalean zabal dezan», azaldu zuten.

Aipatutako eragile horietaz gain, ANVk, LAB sindikatuak eta Udalbiltzak ere bat egiten dute Aberri Egunean Irun eta Hendaia lotzeko ekimenarekin.