Bihar arratsaldean Donostiako Trinitate plazara joaten direnek, Euskal Herriko Txinga Txapelketaz gain, Gipuzkoako aizkolarien finala ere ikusteko modua izango dute, han jokatuko baita finala.

Honako hauek arituko dira garaipenaren lehian: Olasagasti, Peñagarikano, Txapartegi, Azurmendi, Mugertza eta Otaño. Saioan izango diren aizkolari bakoitzak, lau kana-erdiko, lau 60 ontzako eta bi oinbiko moztu beharko dituzte.

Joxemari Olasagasti: Igeldokoa izango da garaipena eskuratzeko faboritoa. Urrezko kopa oso erraz irabazi zuen, eta gauzak normal joanda oso zaila izango da txapela kentzea.

Joxemiel Peñagarikano: Beizamakoa ez da lehengoa, baina bere lana egitera joango da, eta lehen postuetan ibiltzea ez da inongo ezustea izango.

Iñaki Azurmendi: Ezuste galanta eman zuen joan den igandean Euskal Herriko finaletik kanpo geratu ostean. Arriarangoak oraingoan bere maila eman nahiko du.

Luix Txapartegi: Aizarnako aizkolaria sasoi betean dago. Euskal Herriko Txapelketako kanporaketan bigarren izan zen, eta kontuan hartu beharko da bihar ere.

Fausto Mugertza: Mutrikuarrari ez zaio eskarmenturik falta, eta bere lana egiten baldin badu, seguruenik ere ez da azkeneko postuan izango.

Unai Otaño: Lehen aldiz izango da Lehen Maialko finalean. Ibarrakoa oso ongi dago, Euskal Herikoan erakutsi duen moduan, eta ezustea emateko prest dago.