Estatistikek apurtzeko besterik ez dutela balio esaten da. Filosofia horrekin ekin beharko dio Athleticek gaurko norgehiagoka zailari, apurtu beharreko marka kaskar bat gutxi balitz, bi baitira talde zuri-gorriak apurtu behar dituenak.

Alde batetik, duela hogei urte lortu zuten bilbotarrek Mestallan irabaztea azkenengo aldiz. Denbora nahikoa ateak irekitzeko bolada berri bati. Azken jardunaldietan gertatutakoa kezkagarriagoa da, eta gaur egungo egoera baldintzatu egiten du, izan ere, Espanyol eta Deportivoren aurkako partidetan hiru puntu galdu dituzte bilbotarrek azken minutuetan. Helburu, beraz, bikoitza, azken finean betikoa hor badago ere: garaipena.

Sailkapenean dauden estutasunek, gainera, garrantzi handiagoa ematen diete urteko azken jardunaldi hauei. Hiru puntuko aldea besterik ez dago bederatzigarren eta hemezortzigarren postuen artean. Garaipen pare bat jarraian lortzea, beraz, izugarrizko bultzada bilaka daiteke; alderantzizko egoeran dagoenak beherapen postuetan amai dezakeen heinean.

Zoritxarrez edo zorionez, Valentziak ere ez dio lasaitasun handiegiz ekingo partidari, «Koeman efektua» oso azkar desegin baita. Joan den igandean Santanderren galdu ondoren, Champions Leaguen postuetatik irten da taldea, eta are larriagoa dena, txapelketa kontinentalari agur esan zion asteazkenean, lehen fasean, etxean Schalkerekin berdinduta.

Horregatik, Athleticek gaur aurkaria «amorratuta» izango duela uste du Joaquin Caparrosek. «Beren burua eta, batez ere, beren zaletuak pozteko irrikan egongo dira», esan zuen.

Baina entrenatzaile zuri-gorriaren ustean, «etsaiaren sentsazioak ez dira garrantzitsuak. Geureak dira inporta behar zaizkigunak». Eta, ildo horretan, argi dauka Caparrosek bere taldeak «izugarrizko amorrua» daukala azken bi jardunaldietan gertatutakoaren ondoren. «Bideratu egin behar dugu zer edo zer positiboa atera nahi badugu», esan zuen.