Itzubaltzetako Segik iragan urtean etxebizitza eskubidearen alde egindako ekimen eta jardueren berri eman du orduko irudiak biltzen dituen lan baten bidez. Herriko gazte independentistek hainbat protesta ekintza egin zituzten etxebizitzaren arazoaren inguruan, eta orain, egindako lan hori irudi bidez aurkeztu dute.

Taldeak arazoaren inguruko kontzientziazio lan handia egin zuen iragan urte osoan. Martxoan eta apirilean, adibidez, gazteek hainbat pankarta ezarri, eta mural erraldoiak egin zituzten herri osoan zehar. Gainera, Segiko kideek adierazi zuten, gazteak, kapistalismoaren erruz, kalean bizitzera zigortuta daudela. Eskubide hori ukatzen zaiela salatzeko, uztailean eta azaroan kanpaldia egin zuten, Erromoko Kolas plazan lehenik, eta Ibaiondo karrikan geroago.

Dena dela, ziurrenik, gazte independentisten iazko ekimenik ikusgarriena eta deigarriena, Bizkaibusen autobus batean egindako izan zen. Orduan, protesta moduan, bi gazte autobusaren gainera igo ziren. Horren ostean, pankarta erraldoia zabaldu zuten, eta bengala bana piztu zituzten.

Itzubaltzetako gazte mugimenduko kideek aurrera eraman dituen ekimen guztietan jende ugariren babesa jaso zuela nabarmendu nahi izan du. «Herriko bizilagun askok borroka honetan jarraitzeko kemena igorri ziguten», jakinarazi dute.

Espekulazioaren eragina

Erromoko gazte independentisten aburuz, gazteek etxebizitza duina eduki ahal izateko arazoak, «espekulazioak etxebizitzen salneurrian duen eraginak» sortzen ditu. «Espekulatzaileek alokairuaren eta metro karratuaren prezioa oso altua izatea eragin dute», salatu du taldeak.

Horren ildotik, gazte mugimenduak jakinarazi du, iragan urtean aurrera eramandako ekimenetan etxe agentziak, bankuak eta erakundeak «jopuntuan» izan zituztela.