Plasilekin batera, Carlos Vela da udan etorritako fitxaketen artean mailarik onena ematen ari den jokalaria. Mexikarra, ordea, ez da Osasunako jokalaria, Arsenalek utzita ari da Iruñean jokatzen eta formula hori gorritxoentzat interes handikoa denez, Velak Nafarroan jarraitzea ezinezkoa bada, datorren urteetan taldean beste jokalari batzuk izan nahi dituzte kirol arduradunek.

Arsene Wegnerren eskutik, Arsenalek urteak daramatza munduko bazter guztiak arakatzen jokalari gazteen bila. Beste talde handi askok dirutza ikaragarriak gastatu dituzten bitartean, frantziarrak gazte ezezagunen alde egindako apustuak Vieira, Anelka, Cesc Fabregas eta Senderos izarrak «sortu» ditu. Jokalari gazte horiek, ordea, denbora eta minutuak behar dituzte hazten joateko eta hortxe bat egin dezakete Arsenalen eta Osasunaren interesek.

Carlos Vela izan da harreman horren lehen fruitua, eta bi aldeak emaitzarekin gustura daudenez, etorkizunari begira harreman hori handitzeko elkartu ziren asteburu honetan bi taldeetako agintariak Londresen. Egindako bidaiaren inguruan galdetuta, Patxi Izcok ez zuen argibide askorik eman nahi izan, eta «kortesiazko bisita» gisa definitu zuen asteburukoa. «Aspaldi ginen egitekotan eta oraintxe egin dugu».

Carlos Velaren inguruan ere, ez zuen gehiegi hitz egin nahi izan Osasunako presidenteak eta «Arsenaleko jokalaria da» baino ez zuen esan. Hala ere, jakin ahal izan denez, Osasunak Velak beste urtebetez Iruñean jardun dezan eskatu dio Arsenali baina, itxura denez, hori lortzea ez da erraza izango, Arsen Wegnerrek berarekin nahi baitu.

Gauza da, aurrelaria orain Osasunan -lehenago Celtan eta Salamancan- egotearen arrazoi nagusienetako bat espainiar nortasuna eskuratzearen zain dagoela da. Pasaporte horrekin Ingalaterran lan baimena lortuko luke eta, beraz, ez luke Arsenaleko talde nagusian egoteko arazorik izango.

Jokalari interesgarri asko

Velarenak zaila dirudien arren, 40tik gora dira Arsenalek egun dituen jokalariak -horietako asko etorkizunari begira, Realeko Fran Merida kasu- eta horietako batzuk Osasunara etortzeko Richard Lawrekin-gai hau daraman teknikaria- aritu ziren hizketan.

Ingalaterrako hainbat kazetak argitaratu dutenaren arabera, Lawek oso txosten positiboak idatzi ditu Velak Iruñean egindako hobekuntzaren inguruan eta Iruñea oso leku ona iruditzen zaie, batez ere, Hego Amerikako jokalari gazteak utzita joateko. Hizkuntza dela-eta, Afrikako jokalari gazteentzat, Belgikako Beveren izan daiteke gorritxoen antzeko kasu bat.