Noizean behin futbolaren inperioak atsedenalditxoak eskaintzen dituela aprobetxatuz, beren protagonismoa handitzen saiatzen dira gainontzeko kirolak. Uztailaren etorrerarekin, argi dago zeini egokitzen zaion paper hori: txirrindularitzari.

Tourra hastear da eta, ondorioz, jada ohitura bilakatutako keinuen txanda ere heldu da: Pirinioetarako bidaia prestatu, tabernatan -edota GARAn, noski- kinielak egin, ikurrinak garbitu... Horiek guztiak zaleen egitekoak dira, baina benetako protagonistek ere badute zereginik: prestakuntza amaitu, azken helburuak zehaztu, maletak egin... edota, Euskaltel-Euskadiren kasuan, Frantziara joan aurreko agur ekitaldia burutu. Ohitura eskubide osoz hori ere, zortzigarren urtez jarraian hartuko baitu parte Tourrean taldeak.

Eta maletak gogoz eta anbizioz beteta daramatzate laranjek. Gogoa, azken aste hauetako lasterketek eta iazko esperientziak utzitako zapore ona dela eta -Zubeldiak eta Astarlozak aurreko hamarretan amaitu zuten eta Txurrukak Pariseko podiuma zapaldu zuen txirrindulari borrokalariena izan ostean- Anbizioa, iazko listoia gainditu nahi baitu taldeak.

«Iaz egindakoa errepikatzea ezin hobea litzateke -aitortu zuen Miguel Madariagak Euskaltelek Derion duen egoitzan egindako ekitaldian-, baina zer edo zer handiagoarekin amets egiten dugu. Ildo horretan, etapa bat irabaztea zoragarria litzateke». Igor Gonzalez de Galdeanoren ustez, horixe da helburu nagusia, etapa bat irabaztea. «Zenbat eta lehenago lortu, hobe. Gero, Haimar, Mikel eta Samuelekin sailkapen orokor on bat egiten ere saiatuko gara», adierazi zuen talde euskaldunaren idazkari teknikoak bi helburu horien artean aukeratu nahi izan gabe. «Gauza desberdinak dira eta batak ez du beste ukatzen. Hirugarren postuan amaitzeak, egun batean edo bestean garaipenetik gertu ibili zarela esan nahi du».

Helburu politak, dudarik ez, zortzigarren parte hartzea ospatzeko, baita taldearen hamargarren urteurrena edota Euskadi Fundazioaren sorreraren 15. urteurrena ospatzeko ere.

Talde onena

Kontua da lasterketa on bat egiteko aukerak, egon badaudela. Mikel Astarlozak, Iñaki Isasik, Egoi Martinezek, Juanjo Orozek -Tourrean estreinatzen den bakarra- Ruben Perezek, Samuel Sánchezek, Amets Txurrukak, Gorka Verdugok eta Haimar Zubeldiak osatzen dute bederatzikoa -horiekin batera Igor Gonzalez de Galdeano, Xabier Carbayeda eta Gorka Gerrikagoitia zuzendariak joango dira Frantziara-.

«Euskaltelek azken urteotan eraman duen talde onena izan daiteke. Edonork eskura dezake etapa bat. Gauzak ondo joango direla uste dugu», aitortu zuen Mikel Astarlozak. Sentsazio horrekin irtengo da, beraz, taldea bihar Miarritzeko aireportutik.

Etorkizuna

Derion atzo egindako ekitaldian, besteak beste, Jose Antonio Ardanzak hartu zuen parte. Eta Euskalteleko presidenteak esandakoaren arabera, taldea lasai egon daiteke etorkizunari begira Euskaltelekin eta erakundeekin dituzten kontratuak aurten amaitu arren. «Etorkizuna ziurtatuta dago -esan zuen-. Argi adierazi nahi dut Euskaltelek, Eusko Jaurlaritzak eta foru aldundiek txirrindularitzaren aldeko apustuarekin jarraitzeko duten konpromisoa».

Horren erakusle, Arabako Foru Aldundia Euskaltel taldearen babeslea izango da aurrerantzean. Gipuzkoako eta Bizkaiko aldundien bidea jarraituz, bi urtetarako akordioa sinatu du.