Atzokoan egun handia izan zuten Markinako jaietan, Karmen eguna hain zuzen ere. Baina jaiak hasi baino ez dira egin Bizkaiko herri honetan. Gaurko, Karmen Txiki eguna izanik, umeei bereziki zuzendutako ekintzak prestatu dituzte.

Goizean txistularien kalejirak esnatuko ditu markinarrak 09.30etik aurrera. 11.00etan, Markina-Xemeingo trikitilariek alaituko dituzte kaleak. Ordu erdi geroago, umeak etengabe zirikatzeko eta beraiekin jolasteko prest agertzen diren erraldoi eta buruhandiak izango dira txistulariekin batera.

Egun osoan izango dute haurrek herriko zelaian ipini duten parke erraldoian jolasteko aukera; bertan zezen mekanikoak, bai eta quad eta cars-ek ume eta gazte guztien apetak aseko dituzte. Arratsaldean, mus eta briska txapelketak izango dira frontoi txikian, eta emango dituzten dirusariak ondo baino hobeto etorriko zaizkie txapelketan parte hartzen dutenei jaietan xahutzeko.

Gorputza mugitzeko aukera

Eguzkia sartu baino lehen dantzarako aukera egongo da Markinan. 19.00etatik aurrera, umeentzat espresuki prestatutako disko festa eta erromeria egongo da zelaian. Baina hau ez da nolanahiko jaia izango, izan ere, eta ohiko disko jartzaile eta musika taldeaz gain, animatzaile bat ere egongo da umeak koreografien bidez, batuka-dantza eta bestelako dantzagarriekin animatzen.

Ondorengo egunetan ere jaiez gozatzeko aukera egongo Markinan. Bihar, hilak 7, esaterako, goizean eta arratsaldean zesta-punta partidak izango dira eta gauean, berriz, Malabreikers taldearen eskutik, akrobazia, musika eta break dance ikuskizuna eta rock kontzertua herriko zelaian Delorean, Sagarroi eta Flujo Oskuro taldeen parte-hartzearekin batera.

Larunbatean Koadrilen Eguna ospatuko dute eta nabarmentzekoak dira zelaian egingo duten herri bazkaria eta Drindots taldearen erromeria.

Igandean, berriz, markinarrek Karmen jaiei agur esango diete hurrengo urtera arte. Jaiak ondo amaitzeko «Hau dok hau» txarangaren kalejira eta Alarabi deituriko jaietako panpina erreko dute.