Lehen Mailako Txapelketarekin alderatuz gero, jardunaldi bateko atzerapenarekin hasi zen zilarrezkoen ligaxka. Sarritan azpimarratu dugu lehen zortzi jardunaldietan «urrezko» pilotarien maila eta ikuskizuna ikaragarria izan dela, baina ezin ditugu alde batera utzi atzetik gogor jotzen datozen pilotariak.

Del Rey-Merino I.a eta Belloso-Eskudero bikoteek (22-21) Bigarrengoen ligaxkari amaiera eman zioten atzo bertan Beotibar pilotalekuan. Lehenengoek finalerdietarako txartela eskuan zuten jada eta bigarren postua lortzeko garaipenaren bila abiatu ziren. Asegarcekoak, aldiz, nahiz eta kanporatuta egon, bigarren garaipena lortzeko helburuarekin atera ziren.

Hauek dira, beraz, finalerdietara sailkatu diren lau bikoteak: Berasaluze IX.a-Urberuaga / Aritz Lasa-Arruti (Urretxun jokatuko dute ostiralean) eta Del Rey-Galartza VI.a / Mendizabal-Ibai Zabala (Zaldibian neurtuko dira ostiralean).

Lehen fase honetan nolabaiteko ezustea eman duen bikotea Aritz Lasak eta Arrutik osatutakoa izan da. Urretxuko aurrelariak Asperekin debuta egin du txapelketa honetan. Frontisetik zetorren gipuzkoarra eta aipatzen duenez, «nire kasua bote pronto izan zen. Aurretik partida gehiago jokatuta hastea gustatuko litzaidake, baina hala gertatu da». Halaber, diferentziak azaltzean, «giroa ezberdina da, jende gehiagok jarraitzen ditu partidak», azpimarratzen du pilotari gazteak.

Gorabeherak ligaxkan

Baina Aspekoen ezustea ez dator Aritz Lasaren debutarengatik bakarrik. Bi pilotariek gorabehera nabarmena eduki dute euren jokoan. Lehen itzulian partida bakarra irabazi dute. Azken lau jardunaldietan, ordea, hiru garaipen lortu dituzte pilotariek. Horregatik, Aritz Lasak azpimarratzen duenez, «kanporatutzat ematen gintuzten eta oraindik hor gaude».

Gorabehera horren eragilea, aurrelariaren ustez, Arrutiren -beraren bikotea- irregulartasuna izan da: «Ez zuen momenturik onenean harrapatu txapelketa, eta hasiera irregularra eduki zuen. Orain maila onean jarri da, konfiantza hartuz, eta askoz hobeto dago. Uste dut ondo ibiliko garela», azaltzen du gipuzkoarrak.

Ostiralean Berasaluze IX.a eta Urberuaga, pilotari «gogorrak eta partida luzeetara ohitutakoak», edukiko dituzte aurkari. Enpresa berekoak izanda, ez dira elkarren aurka aritu ligaxkan, baina Aritz Lasaren eta Arrutiren estrategia argia izango da: «Ahal den azkarren amaitzen saiatuko gara», esan du urretxuarrak.

Aurrelariak, gainera, etxean jokatuko du, ligaxkan zenbait alditan egin duen moduan. «Ikusleak gure alde baldin badaude, presioa nabarituko dute aurkariek», aitortzen du. Halaber, jarraitzaileei mezu bat bidaltzen die: «Orain arte bezala jarraitzeko eskatu nahi diet, asko eskertzen baita jendea animatzera joaten dela ikustea».