Ligako bigarren itzulian Osasunak bizi izan duen berpizkundea zeri zor zaion aztertzen hasita, asko lirateke zerrendan aipatu beharreko faktoreak: min hartuta zeuden zenbait jokalari osatu izana, Camachok taldeari eman dion irabazle sena, Walter Pandiani goleatzaileak bizi duen une gozoa... Baina horiekin batera, taldeko bikote iraniarra egiten ari den lana ere bereziki nabarmentzekoa izan da. Lesio larri bat gaindituta, Nekounam orain dela bi urte Europa osoa aho-zabalik utzi zuen jokalari haren mailara hurbiltzen ari da apurka-apurka, eta aurreko udan bere herrikidearen pausoak jarraitzeko asmoz iritsi zen Masoud aurrelaria ere bere gaitasunaren berri ematen hasia da.

Futbola, ordea, bizitza bera bezalakoa da, oztopo bat gainditzerako beste batekin topo egiten duzu. Atzo goizean taldeko sendagileek jakinarazi zutenez, «Eneko» eta Masoud sukarrak jota gaixorik daude eta ezingo dute gaur jokatu. Horregatik, Camachok uste baino aldaketa gehiago egin beharko ditu hamaikakoan. Patxi Puñal, zelaierdian, eta Kike Sola, aurrean, izango dira iraniarrek utzitako hutsuneak betetzeko ardura izango dutenak. Miguel Flaño, Josetxoren ordez, eta Delporte, Plasil zigortuaren lekuan, dira hamaikakoan sartuko diren beste bi jokalariak. Berri onena Roberto atezainak eman zuen atzo, astean zehar jasan duen bizkarreko mina gainditu eta jokatzeko prest izango baita. Aurkariari dagokionez, Crusat eta Pellerano dira, biak zigortuta, Almeriak dituen hutsune nagusiak. Haien ordez, Carlos Garcia eta Kalu Uche dira hasieratik arituko diren jokalariak.