Ardenetako bigarren klasiko handia heldu da. Urtero bezala, Amstel Gold Race eta Liege-Bastogne-Liege lasterketen artean kokatuta, Fleche Wallonne lasterketa entzutetsuaren 73. ekitaldia izango da gaur. Tropelak ez du hutsik egingo eta Huyko Hormaren urteroko hitzorduan izango da. Igoera motz baina pikoetan ongi moldatzen diren txirrindulariek aukera bikaina izango dute goi-mailako garaipen bat eskuratzeko.

Ibilbideak 195 kilometro pasatxo izango ditu eta lasterketaren ezaugarri diren 11 horma edo kota igo beharko dituzte. Aurtengo berrikuntza nagusia Bousalleko Kota izango da, helmugatik 22 kilometrora jarri dutena. Helmuga, azken urteotan bezala, Huyko Horman izango dute, 1.300 metro bakarrik izan arren, une askotan %15eko aldapak dituen «zigorra».

Ardenetako eskualdean jokatzen diren beste bi klasikoek baino ospe gutxixeago izan arren, «Valoniako geziak» ere kontuan hartzeko historia du. Irabazleen artean, adibidez, Eddy Merckx handia nabarmendu behar da, bera baita, Moreno Argentin eta Marcel Kintekin batera, proba horretan garaipen gehien lortu dituen txirrindularia -hiru, hain zuzen-. Aurreneko urteetan lasterketa Tournai, Liege, Charleroi edota Verviersen-en egin arren, 1986tik Span hasi eta Huyn amaitzen da.

Kirchenen ordezkoaren bila

Sekulako euri-jasaren azpian, Kim Kirchen luxenburgotarrak garaipen ikusgarria lortu zuen iaz. Columbiako txirrindularia irteeran izango da aurten ere, baina Kaliforniako laugarren etapan jasandako erorketak erabat apurtu zuen Kirchenen plangintza, eta ia ezinezkoa izango zaio gaur onenekin batera ibiltzea. Faboritoen zerrenda, gainera, luzea da oso.

Damiano Cunego (Lampre), Alejandro Valverde (Caisse), Davide Rebellin (Diquigiovanni), Philipe Gilbert (Silence), Cadel Evans (Silence) eta Andy Schleck (Saxo Bank) izan daitezke aipatu beharreko izenak, Amstelen horren ongi ibili ziren Serguei Ivanov (Katusha) eta Karsten Kroon (Saxo Bank) ahaztu gabe.

Eta horiei guztiei aurrea hartzen saiatu beharko duena Samuel Sanchez izango da, 2006an bigarren egin zuen Euskaltel Euskadi taldeko liderra. Asturiarrak erakutsi zuen Euskal Herriko Itzulian sasoi onean dagoela eta Lazkaomendin gora, gaur igoko dituzten mendatetxoen antzik handiena izan dezakeen aldapan, gizonik indartsuenetakoa izan zen.

Edozein lehiaketa irabaztea oso zaila izaten den arren, baikor izateko arrazoiak badaude, euskaldunak ongi moldatu izan baitira Huyko horma horretan. Gogoratu beharrekoa da 2003an gertatu zena, Igor Astarloak irabazi baitzuen lasterketa, Aitor Osa bigarren izan zen eta Unai Etxebarria laugarren. Azken honek, gainera, bigarren amaitu zuen 2002an, Mario Aerts handiaren atzetik.