Bakoitzak bere egitura eta izate propio eta ezberdindua mantentzen duen arren, uztailean gurean diren hiru jazzaldi nagusiak urtero bildu ohi dira, jazz doinuak ez ezik Euskal Herriak duen eskaintza aberats eta zabala medio kanpaina turistikoa egiteko.

Kantauri itsasoa eta Diane Schuur, Spyro Gyra eta Guggenheim Museoa, Pat Metheny eta XIII. mendeko Santa Maria katedrala, upelategietara bisita eta Winton Marsalis, Randy Weston eta hondartzak, gutizia gastronomikoak eta Joe Lovano; amaigabekoa da udak gurean duen eskaintza eta jazz giroari etekina atera asmoz hiru jaialdiek pakete turistikoak eskaintzen dituzte, hoteletako gelak, kontzertuetarako sarrerak eta museoetarako bisitaldiak biltzen dituztenak. Jazz Euskadi egitasmoa da kanpotarrak gurera erakartzeko turismo kanpaina eta elkarlan honen bultzatzaile nagusia; hala, atzokoan Iñaki Saitua (Getxo), Iñaki Asua (Gasteiz) eta Miguel Martin (Donostia) jazzaldien arduradunak bildu zituen bakoitzak bere egitarauaren berri eman zezan.

Getxora aste bukaera honetan bertan helduko da blues jaialdia, eta uztailaren hasieran jazzaldia. Saituak nabarmendu zuenez, «txikiena izanik, krisiak ez du jaialdian eragin nabarmenik izango eta ohi bezala bost egunez garatuko da Getxon, musikari gazteei bultzada emanez». Diane Schuur, Omar Sosa, Michel Camilo, Spyro Gyra eta Pakito D´Rivera & Chano Dominguez dira bertan izango diren izar nagusiak.

Gasteizko Jazzaldia hasiko da gero, uztailaren 12an hain zuzen re. «Aurten kostuak murriztu asmoz ez da jazz piknikik izango Armentian, baina egun kopuruari eutsiko diogu» esan, eta azken aldaketen berri eman zigun Añua zuzendariak: «Uztailaren 17an Billie Holiday hil zenaren 50. urtemuga ospatzen da, eta omenaldia egitekoak ziren Randy Crawford eta Joe Sample, baina biak ospitalean eri direla eta, Dee Dee Bridgewater kantariak ordeztuko ditu». Bestalde, Gasteizko urrezko domina jaso ostean «Vitoria suite» jo eta grabatuko du Winton Marsalisek, besteak beste Paco de Lucia gitarra-jotzailearen laguntzarekin. Krisia krisi, «azken urteetako egitaraurik indartsuenetarikoa dugu», uste du Añuak.

Beste horrenbeste esan zuen Martinek ere, uztailaren 22an hasiko den Donostiako Jazzaldiaren inguruan: «Azkenaldian prestatu dugun erakargarrienetarikoa da». Donostian bai, egun bat gutxiago izango du jaialdiak krisia dela-eta. «Modu horretan kalitatea mantendu nahi izan dugu», azaldu zuen Martinek.

Egitaraurik eklektikoena aurkeztu ohi du Donostiako jaialdiak, eta horrela egingo du aurtengoan ere: Hank Jones eta Roy Haynes ez ezik, Animal Collective eta Jamie Cullumen ere izango dira Gipuzkoako hiriburuan. Aurten, gainera, berritze lanak amaituta Trinitate plaza berreskuratu dutelako oso pozik agertu zen jazzaldiko arduraduna, «hondartzako kontzertuek publikoaren konkista suposatu dute» aipatu eta kontzertu asko doanekoak direla gaineratuta.

Abiadura moteldu

Gainera, udan abiadura baretu eta erlaxatzea da gehien gustatzen zaiguna. «Musika ahalik eta agertoki bikainenean eskaintzea dugu guk helburu eta... gure hiri atseginak asko laguntzen du horretan», esanda bukatu zuen Martinek.