Jean-Claude Agerre eta Xabi Larralde mahaikideak Hautetsien Kontseiluko idazkaritzara hurbildu ziren hautetsientzat autonomia proposamena azaltzen duen txostenaren ale bana uztera eta, bide batez, haien ordezkariekin bilera bat egiteko eskatzera. Larraldek nabarmendu zuenez, «lurraldearen antolakuntza orokorrerako, hots, eremu guztietan etorkizuna gure esku izateko eta ditugun premiei erantzun ahal izateko», estatus hori litzateke «tresnarik egokiena».

Mahaikideak gogoratu zuen «mota edo eredu desberdinekin bada ere, Europako herrialde gehienek (Alemania, Suitza, Italia, Britainia Handia...) lekuko kolektibitateei eskumenak aitortzen dizkieten estatus deszentralizatuak ezarri» dituztela aspaldian. «Alta, -gaineratu zuen- ideologia jakobino zentralistan itsututa, Estatu frantsesa ez da gauza izan etorkizunari aurre egin ahal izateko tresna modernoetara egokitzeko eta tokian tokiko errealitate eta beharrei erantzuten ez dien eredu zaharkituan tematua segitzen du».

Demokratikoa

Horrez gain, Batasuneko bozeramaileak autonomiaren proposamenaren izaera demokratikoa nabarmendu zuen: «Inoiz, gure lurraldeetan autonomia abian jarriko balitz, herritarren borondatearen fruitua izango litzateke. Dagozkien hitza eta erabakia egikarituz, erreferendum bidez hautatu beharko bailukete gobernatzeko sistema. Beraz, gure proposamena erabat demokratikoa da».