Israelek ura kentzen die palestinarrei bai Zisjordanian bai Gazan, legearen kontra lurralde horietan bizi diren kolono sionistek behar dutena baino ur askoz gehiago erabiltzen duten bitartean, Amnesty International taldeak atzo aurkeztu zuen txosten batean salatu duenez.

Mendiko iturburuetatik sortzen den uraren %80 erabiltzen du Israelek, palestinarrentzat soilik %20a utziz. Mendiko iturburuak dira, hain zuzen ere, palestinarrek ura eskuratzeko duten bide bakarra. Israelek, izan ere, Jordan ibaiko ur guztia bereganatzen du, palestinarrei ukatuz. Gazak pairatzen duen blokeoak, gainera, bertako biztanleen egoera are eta gehiago larriagotu du.

Kontuan izan behar da palestinar bakoitzak, bataz beste, 70 litro ur erabiltzen dituela egunero, eta israeldar bakoitzak, bien bitartean, 300 litro. Nekazal eremuetako zenbait herrixkatan, palestinarrak eguneko 20 litro baino ez dituzte eskura; larrialdi egoeretan etxe batek behar duen kopuru minimoa da hori. Palestinako nekazal herrixketan bizi diren 200.000 pertsona inguruk ez dute urik etxean eta Israelgo Armadak, gainera, euri ura biltzen ere ez die uzten.

Palestinarrak egoera horretan dauden bitartean, Zisjordanian nazioarteko legedia urratuz bizi diren kolono sionistek ur ugari behar duten laboreak, lorategi handiak eta igerilekuak dituzte. Hala, Zisjordaniako 450.00 kolonoek 2.300.000 palestinarrek baino ur gehiago erabiltzen dute.

Gazari dagokionez, bertan erabiltzen den uraren %90 eta %95 artean kostaldeko akuiferoetatik hartzen dute; ur hori, gainera, kutsatuta dago eta ez da gizakiek edateko modukoa. Halere, Israelek ez die uzten palestinarrei Zisjordaniako iturburuetatik Gazara ura eramaten.

Hori guztia gutxi balitz, Israelek Gazan ezarritako blokeoak egoera are eta gehiago okertu du, azpiegiturak mantentzeko beharrezko materialak ez baitira zerrendara heltzen. Horrenbestez, gazatarrek ur hornidura eta saneamendu «krisi larria» bizi dutela salatu du IAk.

Etxeetara ura iristen ez denez, palestinar askok kaleko saltzaileei erosi behar diete ura ezinbestean. Gainera, ur horrek, askoz garestiagoa izateaz gain, ez ditu oinarrizko kalitatezko baldintzak betetzen: ur txarra eta garestia ordaindu behar dute.

Okupazio sionista baliatuta, Israelek lur eremu handiak kendu dizkie palestinarrei. Horrez gain, lur horietako putzuak ere bereganatu ditu, palestinarrak ura lortzeko aukerarik gabe utziz.

Armada israeldarraren kontrolak ere salatu ditu AIk, ura eramaten duten kamioiak itzulinguru ugari egitera behartzen baititu kontrolak ekiditeko eta, ondorioz, ura garestitu egiten baita.

Nekazal eremuetako herrixketan, palestinarrak behar duten ura lortzen saiatzen dira, baina Israelek euria biltzeko tankeak ere apurtzen dizkie. Inguruko kolonietan, berriz, lorategiak eguerdian ere, ur gehien galtzen den unean, ureztatzen dituzte. Egoera ikusita, palestinarrei ura ukatzen dieten politikekin amaitzeko eskatu dio Amnesty International erakundeak Israeli.