Gazte mugimendua indartzeko eta bertan partaide diren eremu anitzeko gazteak elkarlanean aritzea sustatzeko, eztabaida prozesu batean murgilduta izan dira iaztik hona euskal gazteak egoeraren azterketa adostu batetik aurrera gazte mugimendua suspertzeko tenorean. Orain, indar metaketa horren lehen geltokia iritsi dela eman zuten aditzera atzo Zestoan; izan ere, bertan ospatuko dira azaroaren 27, 28 eta 29an Euskal Herriko Gazte Mugimenduaren Topaketak. «Bertan, utopia berrien zirriborroa marraztuko dugu. Etorkizunaz, borrokaz, jarrera iraultzaile eta eraldatzailez beteko ditugu karrikak. Borroka ezberdinen tailer-fabrika muntatuko dugu, Euskal Herriko gaztetxe erraldoia bilakatuz Zestoa», azaldu zuten atzo.

Esan zutenez, hilaren amaieran egingo dituzten topaketon aurrelana izan dira azken hilabeteotan hainbat eremutako gazteek herriz herri, eskualdez eskualde eta herrialdez herrialde izan dituzten eztabaidak.

Lehen geltokia, Zestoan

Topaketak «geltoki» gisa ulertzen dituzte, «geltokiaren ostean, abiadura handirik gabeko trenean, apurka-apurka, bide berriak irekiko ditugunaren ziurtasuna baitugu».

Hala, gazteei topaketotan parte hartzeko deia egin zieten.