Ez dira garai onenak Bilbo eta Madril aldean, baina gaur gauean norabidea zuzentzeko aukera paregabea dute bai Athleticek bai Atletico Madrilek San Mameseko futbol zelaian. Bi taldeak bolada txarrean murgilduta heldu dira norgehiagokara, talde bien norabidea ezberdina izan bada ere denboraldiko lehen partidetan.

Bizkaitarrek hasiera ederra eman zioten denboraldiari, lehenengo hiru jardunaldietan hiru garaipen lortu eta Ligako talderik indartsuenei aurre egin baitzieten. Baina oso goiz puztu zuten zuri-gorriek globoa. Gainera, aste honetan bertan Kopan Rayoren aurka jasotako porrotak alarmak piztu ditu.

Atletico Madrilen denboraldi hasiera, aldiz, hondamendi gisa definitu dute Estatu espainoleko hedabide askok. Orain arteko emaitzak, zuri-gorriek 1999/00 denboraldian Bigarren Mailara jaitsi zirenean lortutakoak baino txarragoak dira. Izan ere, jokoan izandako 24 puntuetatik zazpi besterik ez dituzte lortu.

Ligako emaitza txarrak eta madrildarrek Champions Leaguen emandako irudi penagarria dela-eta, Abel Resino entrenatzailea kargutik kendu eta Quique Sanchez Flores ipini du bere lekuan aste honetan bertan Enrique Cerezo Atleticoko presidenteak.

Aldaketa hori kontra edukiko du gaur Athleticek, bai behintzat «entrenatzaile berria, garaipena ziurra» dioen esaera betetzen bada. Egia da Sanchez Floresek asteartean egin zuela debuta -Marbellaren aurka 0-2 irabazi zuen Atleticok-, baina Kopan izan zen, ez Ligan.

Halaber, estatistikak Athleticen kontra daude. Izan ere, San Mamesera egindako azken hiru bisitetan garaipena lortu dute madrildarrek, Kun Aguero eta Forlanen erakustaldiekin, gainera. Uruguaiarrak hiru gol sartu zituen iaz San Mamesen, madrildarrak 1-4ko garaipenera gidatuz. Hortaz, aurrekariak eta Atleticoren aulkian izandako aldaketa kontuan hartuta, inoiz baino indartsuago atera beharko dira lehoiak zelaira lasaitasuna berreskuratzeko aukera emango lukeen garaipena lortzeko.

Joaquin Caparrosek ez zuen atzokoan deialdiaren berri eman. Izan ere, Iraola, Amorebieta eta Llorente bezalako jokalari garrantzitsuen errekuperazioa aztertu nahi du gaur.

Aldaketa bakarra hamaikakoan

Caparrosek taktika landu zuen atzo Athleticek egindako entrenamenduan. Aurreko jardunaldiarekin konparatuta, andaluziarrak aldaketa bakarra egingo du ziurrenik hamaikakoan, Orbaiz Gurpegiren ordez sartuz.

Quique Sanchez Floresek, berriz, San Mamesen 4-4-2 eskema klasikoa erabiliko duela dirudi. Ez du hamaikakoaren berri eman, baina baliteke goialdean Simao, Maxi, Aguero eta Forlan laukoteak hasieratik jokatzea.