Aspeko kideak irribarretsu agertu ziren atzo Zarauzko Aritzbatalde pilotalekuan, eta ez da gutxiagorako. Finalerdietako ligaxkan enpresako lau pilotari sartzea lortu dute, eta beraz, aurtengo Lau eta Erdiko txapela Eibar aldera joango dela gauza ziurra da. Hori ikusita, Martin Alustiza intendenteari eskatu genion final-laurdenetan gertatutakoa eta euren pilotarien nagusitasuna aztertzeko.

«Oso gorputzaldi onarekin gelditu gara. Lau pilotariak azkenean zureak bezala kontsideratzen dituzu. Zuk ez duzu jolasten baina nola-hala parte hartzen duzu. Materialarekin asmatzen saiatzen zara, egunero beraiekin zabiltza... Aurreko ostiralean, final-laurdenetako aurreneko partida hasi aurretik, sekulako zalantzak geneuzkan. Partida erdia pasata Titin galtzen ari zen eta pentsatzen hasten zara. `Gaur Titinek galtzen badik, bihar Aimar Olaizolaren kontra jokatu behar...' Baina azkenean dena ongi irten zen».

Alustiza, ordea, ez da atzo goizekoa pilota munduan eta ongi asko daki pozak azkar egiten duela salto auzora: «Gauza polita da, batez ere udako jaialdi eta torneoetan Asegarcek egurra eman digulako. Orain buelta etorri da. Kirolean edozer gerta daiteke, pilotariak ez dira makina batzuk eta egun txarrak ere izaten dituzte. Edozein modutan, hau ez da gauza normala».

Lau partidak, banan-banan

Finalerdietara sailkatu diren lau pilotarien lana ere banan-banan aztertu zigun Alustizak. «Titini buruz esateko gutxi dago. Urteak aurrera doaz, ez dago zalantzarik, baina azkenean bere kasta berezi horregatik, Titin kantxa gainean ikusteak suposatzen duenagatik irabazi zuen. Uste dut errespetu pixka bat sartu ziola Asier Olaizolari, aurkaria pixka bat kokildu egin zuela, eta horregatik atera zuela partida aurrera».

Onartu zuenez, Retegiren erakustaldia ezustekoa izan zen beraientzat ere. «Badakigu Julen Retegik lau eta erdian asko jokatzen duela, baina aurrean Aimar zeukala kontuan hartu behar da, egungo txapelduna eta neurri honetan bereziki ongi moldatzen den pilotaria. Irabazteko esperantza beti izaten duzu, nola ez, baina horrelako garaipen bat lortzea, horren ongi jokatuta, ez genuen espero, ezta gutxiago ere. Sekulako erakustaldia egin zuen eta hor ikusten da txapela janzteko ere kontuan hartu beharreko pilotaria dela».

«Oinatzek errespetu handia sartzen du, pilotari gogorra da eta berari irabaztea asko kostatzen da. Juanek aurreneko partida zuen ligaxka honetara sartu aurretik eta beti kosta egiten da aurreneko neurketa horretan bakoitzak bere mailarik onena ematea. Baina Juanek ere sekulako kasta dauka eta bere gogoarekin, bere abiadurarekin, lortu zuen partida irabaztea».

Azkenik, asteleheneko partida amaitzerik izan ez bazuten ere, Alustizak ez zion meriturik kendu nahi Gonzalezi: «Pena bat izaten da pilotari bat min hartuta kanpoan geratzea, baina hori gertatu arte Sebas oso momentu onean dagoela erakusten ari zen. Batez ere, tantoa bukatzerako orduan nabaritzen da gauzak oso garbi dituela. Norgehiagoka bertan behera gelditu zenean 17 eta 10 irabazten ari zen, diferentziak markatzen, eta uste dut Sebas ere ongi merezita sartu dela finalerdietako ligaxkan. Pilotari oso arriskutsua izango da».

Irujo faborito bai, baina...

Eta aurrera begira, Aspeko intendentearen pronostikoa ere ezagutu nahi genuen. Alustizak nahiago zuen gehiegi ez busti, baina ulertzen du jendeak Irujo faboritotzat jotzea. «Denen ahotan Irujo dago. Pilotari handia da, jokoaren alderdi guztietan moldatzen da ondo, baina kontuz ibili behar da beste hiru pilotariekin ere, batez ere, aurreko asteburuan zer gertatu den ikusita. Ni ez naiz ausartzen esatera zein izango den txapela irabazteko faborito nagusia. Juan hor dago, baina beste hirurek ere izango dute zer esana».