«Ying eta Yang» kontua izango da, beharbada, baina unerik txarrenetan ikuspegi positiboa nabarmendu daitekeen era berean, albisterik onenek ezkutuko arriskuak izan ditzakete. Askotan hitz egiten da honi buruz futbolean -«galtzen genuenean ez ginen hain txarrak eta irabazten dugunean ez gara hain onak» famatua-, eta topikoari ekin nahi dio Osasunak oraingoan ere, Bartzelonaren aurkako partidaren biharamun goxoak ezustekoren bat ekar ez dezan.

Liderraren aurrean eskuratutako puntuaren ondorengo jokalekua ondo kudeatzea da gakoa, beraz, gorritxoentzat. Sailkapenean eroso daudela eta datorren asteburuko aurkaria askoz apalagoa dela kontuan hartuta, batez ere. Bultzada ederra hartzeko egoera, logikari jarraituz; baina logikak ez du beti lekurik futbolean, eta halako egoeretan, lasaitasuna lasaikeria bilakatzen da maiz, ondoriozko estropezuekin.

Horregatik, larunbatean erakutsitako jarrerari Almerian segida ematearen garrantzia nabarmentzen dute nafarrek. «Bartzelonaren aurka -gogorarazi zuen Patxi Puñalek-, ez genuen kalitate arloan lehiatu, korrika asko egiten eta aurkaria estutzen baizik. Gauza bera egin behar dugu Almerian, bestela gauzak gaizki joango baitira». Kapitainaren esanetan, liderraren aurka egindakoarekin «pozik» egoteko moduan daude, baina horri bueltaka ibili beharrik ez dagoela gaineratu zuen.

Beraren ustez, gainera, garrantzitsuagoa da -analisiak egiteko denbora gutxi pasa den arren-, Osasuna denboraldi hasiera honetan lortzen ari dena, partida guztietan azken unera arte lehiatzen eta «sentsazio onak» eskaintzen ari baita taldea, bai etxean, bai kanpoan.

Joerari buelta

Baita puntuak lortzen ere, azken urteotako egoerarik onenean dagoelarik talde iruindarra.

Javier Aguirreren eskutik 2005-06 denboraldi ahaztezina laugarren postuan amaitu zuenetik, Osasunak ez du lortu Ligako lehen asteetan sailkapeneko alde lasaian egotea. Honakoak, halere, urte hartan gertatutakoarekin zerikusirik ez dauka, bederatzigarren jardunaldian lider baitziren gorritxoak, 18 punturekin, batez ere, Sadarreko ibilbideari esker: bertan jokatutako bost partidetan horrenbeste garaipen lortuta.

Istorio hori ez da errepikatu, ezta gutxiago ere, hurrengo urteetan. 2006-07 denboraldian 8 puntu besterik ez zituen Osasunak bederatzigarren jardunaldian; 9 hurrengoan eta lau iaz, Sadarren partida bakar bat bera ere irabazteko gai izan ez zela. Ondorengoa, ezaguna da. Une larriak bizi izan zituen taldeak urte osoan, azkenean mailan jarraitzea lortu zuen arren.

Aurten, eta Puñalek nabarmentzen duen bezala, sailkapena nahiko estu dago, izan ere, lehia hasi besterik ez da egin, eta, hortaz, aurreko urteetako joerari buelta emateko aukera du Osasunak, bai puntuak batuz (12 oraingoz), bai irudi ona emanez. Motibatzeko, beraz, badauka beste oinarri bat: azken urteotan faltan botatako lasaitasuna lehen baino lehen ziurtatzea.