Tragedia tripa handiarekin eta erditze minak ahal bezala jasanez erietxeko itxarongelan dago, Komedia, tripa handiarekin hau ere, bertan sartuko denean.

Tragedia: (Harriturik) Kome! Zu ere...

Komedia: Ni ere, zer Trage?

Tragedia: Hau da hau patu krudela! (Zerura begira) Zergatik, zergatik, zergatik...

Komediari kontrakzio batek emango dio.

Komedia: (Minaren minez kantuan) Zergaaatiiikkk....

Tragedia: (Laguna lasaitu nahian) Zergatik negar egin. Tripan umetxoa dago...

Komedia: (Izuturik) Nondik?

Tragediak hankartea begiratuko dio Komediari.

Tragedia: Alu ingurutik!

Komedia izuturik, Tragediaren alboan eseriko da. Itxarongelako guztiek eskandalizaturik begiratuko dituzte bi emakumeak.

Tragedia: Nola izan zen Kome, kontaidazu.

Komedia: (Kantuan) Bat, bat, bat... bat parrandan ibili...

Tragedia: (Ulerkor) Bat parrandan ibili.

Komedia: Bi, bi, bi... ez kondoirik ibili...

Tragedia: Ez kondoirik ibili.

Komedia: Hiru, hiru... aluan zapaburu...

Tragedia: Aluan zapaburu.

Komedia: Lau, lau, lau ...

Une honetan, Tragediak sekulako kontrakzioa sentituko du.

Tragedia: (Oihuka aulkitik zutituaz) ¡Se acabó el bacalao!

Komedia: (Berearekin jarraituaz kantuan) Han zegon kabroi handia...

Tragedia: (Medikuari hots eginez) Medikuaren bibotia...

Komedia: (Harriturik) Harexek ez zeukan, ez zeukan...

Tragedia: (Oihuka) Medikuaren bibotia!

Komedia: (Kantatzeari utziz) Baina ze bibote eta ze biboteondo! Horrek ez du benetako letrarekin inolako antzekotasunik.

Tragedia: (Erreguka) Medikua etor dadila, mesedez....

Komedia: Horrek ere ez. Letrari fidel izaten saiatzen ari gara, ezta?

Tragedia: Ondotxo esan duzu...

Komedia: (Kuxkuxero) Zer esan nahi duzu? Hamlet-i adarrak jarri dizkiozula?

Tragedia: (Damuak eta minak jota) Zergatik, zergatik, zergatik... zergaaatttiiik...

Komedia: Berriz ere hasieratik?

Tragedia: (Berearekin jarraituaz kantuan) Zergatik negar egin.

Komedia: Ondo da... (Kantuan) Tripan umetxoa dago...

Tragedia: (Izuturik) Nondik?

Komediak hankartea begiratuko dio Tragediari.

Komedia: Alu ingurutik!

Tragedia eta Komedia bata bestearen alboan, kantuan hasiko dira.

Tragedia / Komedia: (Etsipenez) Hau den, hau den, hau den umoria. Kontsolatzeko, kontsolatzeko, amaren kaltia...

Tragedia: (Aulkian eseriz) Aulkian gora,

Komedia: (Zutik) Aulkian behera,

Tragedia: Aulkian gora gizena.

Tragedia / Komedia: (Minez) Ai, ai, ai, ai...

Komedia: (Aulkian eseriz) Aulkian gora,

Tragedia: (Zutituz) Aulkian behera,

Komedia: Aulkian gora gizena...

Isiltasunean geratuko dira kolpetik.

Tragedia: Kantua honela bukatzen al da?

Komedia: Ez dakit, ez dut sekula jakiterik izan.

Tragedia: Zer?

Komedia: Zezenaren biboterik gabeko aita nor den.

Tragedia: Ezta nik ere.

Bi emakumeek, etsita, elkarri begiratuko diote eta kantuan hasiko dira.

Tragedia/Komedia: Zergatik, zergatik, zergatik... zergaaatiiik...

Tragedia: Zergatik negar egin.

Komedia: Tripan umetxoa dago...

Tragedia/Komedia: (Izuturik) Nondik?

Bi emakumeek kontrakzio gogor bat sentituko dute aldi berean.

Itxarongelako guztiak: (Oihuka) Aluan kanpotik!

Une honetan bi emakumeek aldi berean barre eta negar egingo duen Tragikomedia umetxoa izango dute.