Tragedia jendez gainezka dagoen Zurriolako hondartzan dago azala kremaz beterik eta eguzkiko betaurrekoekin itzalkinaren azpian etzanda. Komedia, laguna errekonozitu gabe, alboan ipiniko zaio arropa eranzten hasiaz.

Komedia: (Kantuan) Si te ha pillao el toro, jodete...

Biluzirik geratu den Komediak hondarra botako dio Tragediari oharkabean.

Tragedia: (Haserre) Jodete!

Komediak ezusteko galanta hartuko du eta ezingo dio barreari eutsi alboan duen kremaz beteriko emakumea ikustean.

Komedia: (Barrez) Hara, momia bat!

Tragedia: (Ulertu gabe) E?

Komedia: Ez, no, nothing... excuse me. I am going to the water, ok?

Tragedia: Water? Emango dinat niri hiri bater.

Tragediak betaurrekoak erantziko ditu.

Komedia: (Laguna errekonozituaz) Traje!!! Baina zer egiten dun Tutankamon piura horiekin?

Tragedia: (Lehor) Eta hik? Zer egiten dun larrugorritan? Ez al hengoen Erriberrin hire amorante berri horrekin antzezlan klasikoak ikusten?

Komedia: Bai, baina herria zahartu egin zunan bat-batean. Eta hi? Ez al hengoen Almagron edota Meridan hire koinataren ilobaren andrearen lehengusuaren anaiaren hiletaren antzezlanean?

Tragedia: Bai, baina loreontzi klasiko batek buruan jo eta seko geratu zunan nire koinataren ilobaren andrearen lehengusuaren anaia interpretatzen zuen aktorea.

Komedia: (Ulertu gabe) A...

Tragedia toallatik zutituko da azalean erantsitako krema ahal moduan kenduaz.

Tragedia: (Haserre) Behin etorriko hondartzara eta begira, kroketa bat naun.

Komedia: (Barrez) Bai horixe, pekadun bexamela eta guzti.

Tragedia: (Hondarra kendu ezinik) Nudista nazkagarri hauek...

Komedia: Desde luego, sarrera debekatu beharko liekete, hondartza guztia kakaz beterik uzten dinate eta.

Tragedia: Nortzuk? Zakurrek?

Komedia: Ez, emakumea. Jazz musika aldrebes hau gustuko duten frikiek.

Tragedia, izuturik, itzalkinaren atzean ezkutatuko da.

Tragedia: (Izuturik) Non daude?

Komedia: Nudistak?

Tragedia: Ez, friki estralurtarrak.

Komedia, izuturik, Tragediaren atzealdean ezkutatuko da.

Komedia: (Izuturik) Non daude?

Tragedia: Estralurtarrak?

Komedia: Ez, Nudistak.

Tragedia zur eta lur geratuko da.

Tragedia: Kome, Jainkoak mundura ekarri bezala hago eta nudistak non dauden galdetzen didaan?

Komedia: Ssss... hitz egin baxuago!

Tragedia: (Ahopeka) Zer gertatzen dun?

Komedia: (Ahopeka) Nudisten sektan sartu naun eta bainujantzia daraman traidore batekin harrapatuz gero, nireak egin din.

Tragedia: (Mehatxatuaz) Ba gauza bera gertatuko zain frikiak non dauden esaten ez badidan.

Une honetan Jazzaldiko kontzertuaren musika entzuten hasiko da hondartza jendez beteaz.

Komedia: Hemen ditun.

Tragedia: (Izuturik) Non?

Komedia: Hire ondoan.

Tragedia: (Oihuka) Friki estralurtarrak!!!...

Komedia: Non?

Tragedia: Hire ondoan.

Komedia: (Oihuka) Nudista estralurtarrak!!!...

Tragedia/Komedia: (Oihuka) Aaaa!!!...

Tragedia eta Komedia, zeharo izuturik eta oihuka, marmokaz beteriko itsasora abiatuko dira korrika.