Bilduk, Saioa Villanueva Sopelako alkatearen eta Zuriñe Gaintza Bizkaiko Batzar Nagusietako bozeramailearen bitartez, Bizkaiko aurrekontuei buruzko hausnarketa egin zuen atzo, Bilbon. Villanuevaren hitzetan, 2011ko maiatzeko hauteskundeen ostean, Bilduk «argi ikusi zuen beharrezkoa zela herritarren parte-hartzeari lekua egitea». Horiek horrela, ordura arte, inoiz ezkerrak gobernatu gabeko herrietako alkatetza lortu zuen koalizioak. «Ordutik gaur arte, gauzak egiteko betikoa baino modu gehiago daudela erakusten saiatu da Bildu», adierazi zuen Sopelako alkateak.

Nabarmendu zuenez, zenbait udaletan milioi askotako zorra jaso dute herentzian, eta «ahal izan duten neurrian» gardenak izaten saiatu direla ziurtatu zuen. Helburu horrekin, herritarrei urteetan handituz joan den zuloaren berri eman dietela adierazi zuen.

Lemoa da egoera horretan dagoen herrietako bat, eta hain zuzen ere, aurrekontuak osatzeko izandako arazoak zerikusi zuzena du EAJk utzitako herentziarekin, hainbat milioi euroko zorra baitauka Udalak. Hala ere, herritarren parte-hartzea nabaria izan da, erroldatutako biztanleen %10ek parte hartu baitute herri batzarretan. Sopelan ere herritarren parte-hartzea deigarria izan da, «inkestak egin ditugu herritarren artean, eta buzoiak jarri dira jendeak erantzunak bota ditzan», azaldu zuen bertako alkateak.

Koalizioa oposizioan izan den herrietan ere parte-hartze ereduak defendatu dituztela nabarmendu, eta alde horretatik EAJk izandako jarrera salatu zuen Villanuevak, bere hitzetan, «ez baitigu entzun ere egin». Lezama herrian, Bildu oposizioan dagoen talde bakarra bada ere, koalizioa guztiz baztertu dute, lau egun eman baitzion EAJk Bilduko taldeari aurrekontuak aztertzeko, eta gero, onartu egin zituzten. Edota Balmasedan, non Bilduk osoko zuzenketa aurkeztu zuen, baina EAJk ez zuen inolako ekarpenik onartu.

Bizkaiko Batzar Nagusiak

Bizkaiko Batzar Nagusiei dagokienez, EAJk PPrekin adostu zituen aurrekontuak. Horren harira, Bilduk osoko zuzenketa aurkeztu zuela baina ez ziotela ezer onartu salatu zuen Zuriñe Gaintzak. Bestalde, are eta larriagotzat jo zuen, koalizioak berrehundik gora zuzenketa jarri izana eta EAJk bakar bat ere ez onartzea. Gainera, EAJren eta PPren jarrera salatu zuen, Gaintzaren aburuz, bi alderdiek ez baitzuten onartu aurrekontuaren %2a euskarari ematea, ez Gizarteratzeko Laguntza Berezien diru-lerroa lehenengoan uztea, ez zerga bilketan aldaketak egitea, gehiago dutenek gehiago ordain dezaten. «Azkenean euren neurrira egindako aurrekontuak onartu zituzten, herritarrak zeharo ahaztuta», salatu zuen. Bestalde, Bilduk Batzar Nagusietan egindako lanari dagokionez, Gaintzak azaldutakoaren arabera, hilabete izan zuten batzarkideek aurrekontuak prestatzeko, eta tarte horretan horiek jendarteratzeko asmoz koalizioak «lan handia»egin zuela adierazi zuen. «Eskualde guztietara joan ginen, eta bakoitzean jendeak ikusi egin zuen haiengan ze onura eta ze kalte izango zuten aurrekontu horiek. Hartara, jasotako ekarpen guztiak aurrekontuetan sartzen saiatu gara», nabarmendu zuen.