Iragan astean jakin zen Bernardo Atxagaren «Zazpi etxe Frantzian» (Pamiela), Independent Foreign Fiction Prize sarietako 30 lehenengoen artean sailkatu zen aurreneko euskarazko eleberria, bost finalistetatik kanpo gelditu zela. Atzo, ordea, beste sailkapen bat ezagutarazi zuten, «Shadow» Independent Foreign Fiction Prize delakoa, eta bertan sei onenen artean aukeratu dute. Atzerriko fikzioaz idazten duten blogarien kolektiboak egin du hautapena, eta ofizialaren parean kokatu dute.

«Gerizpeko epaimahaia» (shadow jury) deritzon taldea osatu duten blogarien guneak honako zazpi hauek dira: Winstonsdad, Eleutherophobia, Robaroundbooks, Inside Books, Anz Litlovers Litblog, Tony´s Reading List, eta The Parrish Lantern.

Atxagaren eleberria Margaret Jull Costak itzuli zuen -«Seven Houses in France» (Harvill Secker)- eta oso harrera ona izan du Britainia Handian. Gainerako finalistak hauexek dira: Sjon-en «From the Mouth of the Whale» (Telegram Books), Peter Nadasen «Parallel Stories» (Jonathan Cape), «Scenes From Village Life» (Chatto & Windus), Matthias Politycki-ren «Next World Novella» (Peirene Press) eta Umberto Ecoren «The Prague Cemetery» (Harvill Secker).

Gerizpeko epaimahaiak maiatzaren 14an jakinaraziko du irabazlearen izena, epaimahai ofizialak berea eman baino ordu batzuk lehenago.