Ordizian ezinegona da nagusi, errugbi taldea dela-eta. Orain hiru aste Kopa irabazi zuten, eta bihar Liga irabaz dezakete. Herri osoa urduri dago, baita bailara osoa ere. Egindakoa handia izan da, baina oraindik eta handiagoa lor dezakete, eta horretaz oso harro daude denak. Bihar mundu osoa Valladolidera begira egongo da, han jokatuko baitu finala Quesos Entrepinaresen aurka, 18.00etatik aurrera.

«Gogoz gaude. Egia da Ligan bi partidak irabazi dizkigula, baina bietan erakutsi genuen haiek baino gutxiago ez ginela. Orain emaitzekin ere gauza bera erakutsi nahi dugu», dio Axio Araña entrenatzaileak. «Guk geure alde ona badugu, Kopa irabazita gaude, eta haiek berriz, ezer ere ez. Dena irabazteko egindako taldea da Quesos Entrepinares, eta oraingoz ez du ezer irabazi. Presio hori izango dute, eta etxean aritzearena ere bai», erantsi zuen Arañak.

Entrenatzaile ordiziarrak zer egin behar duten ere oso garbi dauka: «Indartsu hasi behar dugu. Kopako finaleko lehen hogei minutuetan baloia ez genuen usaindu ere egin, eta alde handia kendu zigun El Salvadorrek. Gero, doi-doi izan bazen ere, buelta eman genion, baina horrelakoak oso gutxitan gertatzen dira. Pasa den astean alderantziz gertatu zen, ordu laurdenean lau entsegu egin genizkion Gernikari, eta horrek segurtasun handia eman zigun. Beraz, hasiera ona egin beharra daukagu. Gero, uztartzeetan ere lan ona egin beharra daukagu. Bi lan horiek ongi egiten baditugu, oso estu hartuko dugu Quesos, eta irabazteko ere geure aukerak izango ditugu», esan zuen Axio Arañak.

Aurretik jartzea

Aurrez aipaturiko guztiez gain, beste gako bat ere egon daitekeela onartu zuen Ampo Ordiziako entrenatzaileak: «Niretzat beste gakoetako bat aurretik jartzean egongo da. Markagailuan agintzen hasten baldin bagara, beraiek urduri jarriko dira, eta final batean atzetik jarritakoan bihotzak agintzen du, eta ez buruak, eta orduan hutsak ere asko egiten dira. Ea aurretik jartzea lortzen dugun», dio Arañak.

Kopa irabazi berria dauka talde goierritarrak, baina hura ahaztu eta biharko finalean sartuta daudela dio Axio Arañak: «Orain bai. Aste honetako entrenamenduetan ikusten da jokalariak gogoz daudela, eta biharko finala buruan dutela. Nik uste dut Gernikako partidaren atzetik hasi direla konturatzen berriro ere finalean gaudela. Nik pasa den asteko norgehiagokari banion beldurra, Kopako kontuekin genbiltzalako denak, baina talde bizkaitarrari irabazi genion, eta jokalariek badakite gauza handi bat egiteko atarian gaudela, eta horretarako borrokatzeko prest daude», esan du entrenatzaileak. Beroa izan daiteke beste aurkarietako bat, baina horrek ere ez du gehiegi kezkatzen entrenatzaile ordiziarra, biei eragingo baitie.