Atarrabiako jaiek jarriko diote amaiera Iruñerriko festen zikloari. Apirilean hasi ziren lehen jaiak Sanduzelain eta urrian amaituko dira Atarrabian. Hilaren 13ra arte iraungo dute azken jai hauek. Beraz, gozatzeko aukera ugari gelditzen da oraindik.

Etxebeltza elkartea izango da gaur eguerdian suziria piztuko duena, Atarrabiako Udalbatzak hala erabakita, gainerako kolektiboen sostenguarekin. Elkarte honek jai herrikoien, euskal kulturaren eta euskararen alde urteetan egindako lana aitortu eta eskertu nahi izan dute txupinazoa jaurtitzeko ohorea aurten berari emanda.

Suziria piztu aurretik jaietako kartel lehiaketaren sari banaketa egingo dute udaletxean, eta festak hasi eta berehala erraldoi eta kilikien konpartsa abiatuko da herriko kaleetan barrena, txistularien, gaiteroen, dultzaineroen eta txarangaren laguntzarekin. 12.15ean Udaletxeko Plazan, Mikelats taldearen dantza jaialdia izango da.

Arratsaldeko 17.30ean herri kirolak izango dira Udaletxeko Plazan Zurgai taldearekin. Ordu berean, kalejira aterako da txarangarekin eta kilikien konpartsarekin. Ibilbide hau egingo dute: Oianpea, Karrobide, Kapanaburua eta Ezkaba kalea Aita Domingotarren egoitzara iritsi arte.

Iluntzearekin batera, zezensuzkoak gaztetxoei lasterka eginaraziko die, 20.15ean, Kale Nagusitik abiatuta. Udaletxeko Plazan, berriz, dantzaldia izango da Trikiteens taldearekin.

Bihar egun nagusia izango dute Atarrabiako jaietan, prozesio eta guzti. Txirrindularitza lasterketa eta pilota partidak (aurten Atarrabia pilotalekuan jokatuko dira berriz) izango dira kirolari eskainiko zaizkion tarteak eta kalejira, dantzaldia eta zezensuzkoa ere izango dira.

Gazteen antolakuntza

Benetan jai luzeak dira Atarrabiakoak eta bi asteburuen artean kokatzen diren egunak giroz betetzea erronka handia izan ohi da. Aurten, Gazte Asanbladak, Ernaik eta Gazte Kontseiluak antolatuta, jinkana egingo dute astelehenean, gazteen arteko harremanak sendotzeko helburuarekin. 23.00etan hasiko da, eta aurretik, afari autogestionatua izango dute. Ibai Diaz antolatzaileak azaldu zuenez, herriko edozein kuadrillak parte har dezake jinkanan, eta momentuz hogei taldek eman dute izena, bakoitza zortzi eta hamar lagun artekoa. «Oso pozik gaude gazteen partetik jaso dugun erantzunarekin», gaineratu zuen.

Dena den, jinkana Atarrabiako gazteek antolatzen duten ekimenetako bat baino ez da. Astelehenean bertan, mozorro lehiaketa izango dute txosnetan eta astean zehar kontzertu mordoa entzuteko aukera izango da bertan. Gaurko ere bazkari intsumitua prestatu dute, eta ondoren, Iruñerriko Elektrotxarangak lagunduta, kalejira egingo dute.

Ostegun gauean, berriz, film laburren lehiaketa egingo dute Atarrabiako frontoian. Hamar film ikusteko aukera izango da, bakoitzak zortzi minutuko iraupena duelarik.

Ostiralean, Gazte Eguna ospatzeko, kalderetez osaturiko bazkaria egin, eta zurrakapotea dastatzeko aukera izango dute.