Bizkaiko Bertsozale Gazteen eguna, larunbatean
BILBO
Larunbat honetan egingo dute Larrabetzun Bizkaiko Bertsozale Gazteen 3. Eguna. Etxahun Lekue bertsolariak atzo egitarauaren aurkezpenean esan zuenez, Bizkaian bertso-eskolen inguruan mugitzen diren bertsozale gazteentzat erreferente izateko asmoz sortu zuten eguna. Aurtengo Bertsozale Gazteen Egunean, ohikoak diren ikuskizun eta erromeriez gain, Onintza Enbeitak, Iratxe Ibarrak eta Oihane Pereak “Emetik” bertso-kabareta aurkeztuko dute. Onintza Enbeitaren esanetan, euren sentipen eta bizipenak biluzteko saioa da bertso-kabareta. Eta Peru Aranburu eta Galder Bilbao preso dauden bertsolari-kideak gogoratuz amaitu zuten prentsaurrekoa.
Poteo musilaka, bazkaria eta Bizkaiko eskualde bakoitzaren ikuskizunaren ondoren “Emetik” ikuskizuna eta erromeria izango dira.
|
