DONOSTIA

Finalerdia orekatu samar ageri da, nahiz eta Olasagasti aterako den faborito. Dena dela, egin beharreko lana oso aproposa da Arrospiderentzat, eta orain arte oso ongi moldatzen dela erakutsi du. Final-laurdenetako ligaxkan, bere multzoan nagusi izan zen, Mindegiari irabazi eta Larretxearekin berdinduta.

Olasagasti, aldiz, bigarren izan zen bere multzoan. Estreinako jardunaldian Igeldokoak Nazabalekin galdu egin zuen, eta bigarrengoan, berriz, Txapartegiri irabazi egin zion. Etzi gertatzen dena gertatu, nafar bat eta gipuzkoar bat izango dira finalean.

Hasteko, 45 ontzako enborra moztu beharko dute ahalik eta kolperik gutxienean. Hori amaitutakoan, kana-erdiko bat moztu beharko dute zutik jarrita. Hori bukatzean, beste kana-erdiko bat izango dute zain, baina oraingoan etzanda izango dute, eta erlojuz kontra neurtuko dira. Laugarren proban, bi 45 ontzako izango dituzte jarraian mozteko. Bata zutik, eta bestea etzanda. Gero, 60 ontzakoa zeinek azkarrago moztu neurtuko dira, eta azkenik saio luzea izango dute, eta 2 45 ontzako, bi kana-erdiko, eta bi 60 ontzako erdibitu beharko ditu aizkolari bakoitzak.

23 urtez azpikoen lehiaketan, bi finalerdiak bihar jokatuko dira Igorren 21.00etan hasita. Alde batetik Mugertza II.a eta Rekondo neurtuko dira, eta bestetik, berriz, Atutxa II.a eta Otaegi. Bi neurketa horietan ez dago faborito garbirik.