BILBO

Bourgoin ez da edonolako taldea, eta euskaldunek ez dute erraza izango garaitzea. Gaur egun, laugarren tokian daude sailkapenean, eta biarriztarrek baino puntu bat gehiago dute. Julien Bonnaire taldeko kapitain eta Estatu frantseseko selekzioaren zortzi zenbakia da beren jokalari ezagunena, baina taldea ere ez da makala.

Biarritzek jokoa hobetu beharko du puntuak eskuratzeko. Tolosaren aurkako partidan ez zen gaizki aritu, baina gehiago eman beharko du garaipena etxean geratzeko.

Hasieratik jokatzen duten jokalari askok min hartuta jarraitzen dute, eta horrek jokoan eragina izan dezakeen arren, zuri-gorriek aurre egiten jakin beharko dute. Balan, Lievremont, Bidabe, Couzinet, Gobelet eta Thion ­beste askoren artean, hamabi jokalari baitaude min hartuta­ oraindik ez dira osatu, nahiz eta hurrengo asterako jokatzeko moduan egon daitezkeen.

Hala ere, hamabosteko indartsua aurkezteko moduan izango dira zuri-gorriak. Klubaren web orrialdean jakinarazitakoaren arabera, ondorengo jokalariek hasiko dute partida: Lealamanua, August ­kapitaina­, Lecouls; Dellape, Carizza; Betsen, Dridi, Harinordoki; Yachvili, Peyrelongue; Bobo, Traille, Cabannes, Masi, Brusque.

Deialdian sartu diren gainerakoak Noirot, Moala, Padro, Duvallet, Gaitan argentinarra, Dambielle eta Hall dira. Azken hori aurtengo udan egindako fitxatzeetako bat da, eta deialdian sartzen den lehen aldia da lesioekin arazoak izan baititu liga hasiera honetan. Hegoafrikarrak 27 urte ditu eta bigarren lerroan jokatzen du.

Aviron, bihar Staderen aurka

Frantziarrak liderrak dira eta ez dute mementoz partidarik galdu ­lau garaipen eskuratu dituzte lehendabiziko lau jardunaldietan­. Avironek, aldiz, ez du puntu bakar bat lortu, eta azkeneko postuan dago. Ia nahi eta nahi ezkoa duten arren, baionarrentzat oso zaila izango da garaipen batekin etxera itzultzea.