Bizkaiko «Hitza» egunkariek Aldundiaren ezetza salatu dute
BILBO
Bizkaiko Foru Aldundiak atzera bota du herrialde horretako “Hitza” egunkariek jarritako errekurtsoa, eta eskualdeko euskarazko egunkariak ez laguntzea erabaki du. Erabaki horren aurrean «haserrea eta ezinegona» azaldu zuten atzo kaltetutako egunkarietako arduradunek Bilbon, Gotzon Lobera buru duen Bizkaiko Foru Aldundiko Euskara Sustatzeko Zerbitzuak baztertu egiten duelako “Hitza”, formalismo arrazoiak aitzakiatzat hartuta.
Lea-Artibai eta Mutrikuko eta Busturialdeko “Hitza” egunkarietako ordezkariek enpresak direla nabarmendu zuten, eta ez irabazasmorik gabeko elkarteak, eta egiten duten ekarpena errekonozitu gabe segitzen dutela kritikatu zuten. Bizkaiko gainerako euskarazko herri argitalpenei ematen dizkien neurri eta proportzio bereko laguntzak eskatu zitzuten, enpresak izanik eta hedabide guztien moduan laguntza publikoen beharra dutelako.
Ezezkoaren aurrean zenbait gogoeta azaldu zituzten; «ekarpen handia» egiten dietela «euskararen normalizazioari eta zabalkundeari», deialdiak dituen irizpideekin «bete-betean» bat egiten dutela, Lakuako Euskara Biziberritzeko Plan Nagusiak tokiko komunikabideei ematen dien berebiziko garrantzia, edota egunero dituzten milaka irakurle.
|
