Urtarrilean hasiko du bira Atom Rhumbak CDa aurkezteko
BILBO
Atom Rhumbak ‘‘Amateur Universes’’ diskoa aurkezteko bira jarriko du martxan urtearen hasierarekin batera; eta ‘‘Universal Amatour’’ izena izango du. Hainbat kontzertu dituzte zehaztuta, bandako iturriek jakinarazi dutenez. Urtarrilaren 26an hasita, Guadalajara, Cartagena, Lleida, Bartzelona, Valentzia, Alacant, Bilbo, L'Hospitalet, Badajoz edota Madril bisitatuko dituzte. Hala ere, oraindik kontratazioa irekita dago eta aurki biraren kontzertu gehiago jakinaraziko dituzte bilbotarrek. Bestalde, ‘‘Ruta 66’’ aldizkariak «hilabeteko diskoa» aukeratu du ‘‘Amateur Universes’’ abenduko alean. Gainera, diskoari buruzko kritikak «bikainak» izaten ari direla nabarmendu dute taldeko kideek, eta, esaterako, bost izarretik lau eman dizkiote bi egunkaritako musika gehigarrietan. Halaber, Borja Crespo euskal zinemagileak Atom Rhumbaren ‘‘Amateur Universes’’ diskoaren lehen bideoklipa zuzendu du; ‘‘Body Clock’’ izenburuko kantuaren klipa, hain zuzen ere. ‘‘Txakurkalea’’ filmaren soinu bandak taldearen bi abesti ditu; David Civico eta rePLAY dira ikuskizun eta dokumental horren egileak.
|
