- Bigarren B Maila
Ipuruako garaiezintasuna hautsi zuen Real Unionek play-offera itzuliz
·Eibarrek 9 jokalarirekin amaitu zuen partida, Fagoaga eta Gurrutxaga galdu eta gero
EIBAR 1
REAL UNION 2
Eibar: Trevi;Manel, Fagoaga, Alaña, Gurrutxaga, Etxabe;Altuna, Rubén García;Romo (Eizagirre, min.46), Codina (Iker Garai, min.71);eta Rebollo (Iñigo, min.46). Real Union: Otermin;Badiola, Larrainzar, San Miguel, Zarzuelo;Markel;Endika (Huegun, min.50), Joseba Agirre, Juan Domínguez (Seguro, min.87), Lucio (Dani, min.62);eta Sergio Francisco. Epailea: Martínez Montoro (madrildarra). Txartela erakutsi zien Etxabe, Eizagirre, Iñigo, Trevi, Manel, Larrainzar eta Joseba Agirreri. Gainera, Fagoaga (43’, txartel gorriaz), Gurrutxaga (69’, txartel ori bikoitzaz) eta Eibarren bigarren entrenatzailea Iñigo Arriola bota zituen. Golak: 0-1, 45’:Sergio Francisco, penaltiz. 1-1, 61’:Codina. 1-2, 88’:Huegun. Gainontzekoak: 1.500 ikusle Ipuruan.
EIBAR
Bigarren derbi gipuzkoarra jarraian Ipuruan eta, bigarren aldiz, epailea protagonista. Real Unionek Ipuruako garaiezintasuna hautsi zuen atzo, Eibarrek bederatzi jokalarirekin amaitu zuen partida irabazi eta gero. Ondorioz, bi taldeak dauzkagu egun play-off postuetan.Partidak ez zuen atsedenerako aukerarik eskaini lehenengo minutuetatik, Eibarrek eta Real Unionek jarritako gogoei esker. Bi entrenatzaileek aurrez aitortu zuten bezala, talde biak garaipenaren bila aritu ziren hasieratik eta atezainek lan galanta izan zuten lehen zatian, Badiola, Codina, Altuna, Endika, Etxabe edota Sergio Franciscoren jaurtiketen aurrean. Lehen jokaldi erabakiorra 43. minutuan heldu zuen. Endika hiru etsairekin batera abiatu zen Treviren urrunketa baten bila eta Fagoagaren bultzakadatxoa ikusita, epaileak penaltia eta defentsa nafarraren kanporatzea agindu zituen. Sergio Franciscok penaltia sartu eta Real Union abantailarekin joan zen atsedenaldira. Jokalari bat gutxiagorekin egon arren, Eibar jo eta ke aritu zen bigarren zatian berdinketaren bila, irundarrek aldiz, partida kontraerasora erabakitzeko aukera itxaroten zuten. Kasu horretan etxekoak suertatu ziren garaile, 61.minutuan Codinak banakoa sartu baitzuen Altunak baloia zutoinera bidali eta gero. Epaileak zer esanik bazuen oraindik, hala ere:Sergio Franciscoren gola baliogabetu zuen eta, jarraian, Gurrutxagari bigarren txartela erakutsi zion. Javier Mandiola bere defentsa indartzen saiatu zen berdinketa mantentzeko, baina Real Unionek ez zuen aukera galdu eta azkenengo minutuetan Huegunek 1-2ko gola sartu zuen.
|
