DONOSTIA
Fusto argentinarrak iaz Jon Torrerekin batera lortutako titulua defendatuko du gaur hasiko den Euskadiko Binakako pala Txapelketan. Bizkaitarrak final hartan adierazi zuen, agian hura izango zela bere azken Binakakoa eta atzo egindako aurkezpenak horixe baieztatu du. Berrikuntza nagusia Imanol izango da, iaz Sebasekin Elite Txapelketa irabazi zuen atzelaria. Sei bikote parte-hartzaileak hauek dira: Fusto-Aierbe, Gaubeka-Beldarrain, Urkijo-Lujan hamaika eta erditik sakatu beharko dute, Urkia-Rekalde, Ziskar-Galan eta Iriondo-Imanol hamaikagarren koadrotik sakatuko dute.
Aurreneko ligaxkan denek denen aurka jokatu beharko dute eta lehen lau sailkatuek partida bakarrera jokatuko diren finalerdietarako txartela lortuko dute. Final handia martxoaren 31n, larunbatez, jokatuko dute eta partida guztiak Bilboko Deportivon jokatuko dira, larunbateko jaialdietan.
Aurkezpen ekitaldian, azken bi urteetako txapelduna den
Pablo Fusto pozik azaldu zen lehiaketa «garai onean» iritsi zaiolako eta
bularraldeko lesioa eta gero bi aste daramatzalako «maila onean» jokatzen.
Esteban Gaubeka aurrelaria ere gogotsu azaldu zen behingoz Binakakoa irabazteko.
«Bi final jokatu ditut eta ea hirugarren aldian irabazteko gai naizen», azaldu
zuen itxaropentsu.
