Euskal kultura eta euskararen erabilera elkartzen dituen egitasmo pedagogikoa
·Euskal Kultur Erakundeak sortu «Bat, biga, hiru»ren emaitza Luhuson ikusi ahal izanen da
BAIONA
Bat, hitz bat. Biga esaldi. Hiru testu. “Bat, biga, hiru” izena du Euskal Kultur Erakundeak Hiru Saretako ikastetxeei proposatu dien egitasmoak. Bertan, euskal kultura lanabes izanik, gaztetxoek idazketa eta irakurketa landu behar izan dituzte marrazketarekin eta irudimenarekin batera.
Haurrek nahi duten hitza aukeratu dute eta zergatik aukeratu duten idatzi eta gero, marraztu behar izan dute. Biga partean, esahera zahar bi irudikatu behar izan dituzte, eta azkenik hiru alegia idatzi eta gogoz ikasten saiatu dira.
Seaska, Euskal Haziak eta Biga Baiko 23 ikastetxek eta 512 haurrek hartu dute parte EKEk Batekmila egitasmoan irakaskuntza integratzeko sortu duen sailean.
Gaztetxo guztien lana Luhusoko gelan ikusi ahal izanen da martxoaren 25ean eta 26an. Erakusketarekin batera zenbait ikaslek alegiak antzeztu, irakurri edo kantatuko dituzte. Horretaz gain, 25ean Haurrock taldearen kontzertua izanen da arratsaldeko lauretan, eta 26an haurrentzako jokoak Xiba elkartearekin.
Haurrek alegiak ikasteko Arantxa Hirigoyenek hitzak moldatu ditu, eta Philippe Alborrek testuak musikatu ditu. Udako oporrak aitzin alegia musikatuekin disko bat kaleratuko du EKEk.
|
