Elorrion egingo duten Ibilaldiak prest du kantua
BILBO
Elorrioko Txintxirri ikastolako arduradunak ari dira pixkanaka Ibilaldirako dena prestatzen, eta atzo abestia eman zuten ezagutzera. Datorren maiatzaren 28an ospatuko den festarako kantuaren letra Aritz Luzarrek idatzi du, eta ahotsa, Luzar berarekin batera, Vulpes taldeko Mamen Rodrigok ipini dio.
“Ibilaldia, ametsera batzen gaituen katebegia” leloa du, eta antolatzaileek atzo zera argitu zuten: «Leloan, Ibilaldia bera ageri da batzen gaituen katebegi legez, hala ere, ateak zabalik uzten ditu zuek bilatu edo erabaki dezazuen zer den zinez batzen gaituena».
Luzarrek euskararen erabilera eta transmisioaren garrantzia islatu nahi izan du, «euskara museo batean gordetzeko hizkuntza izan ez dadin. Gure esku dago erabiliaz biziaraztea», esan zuten.
Hizkuntzari dagokionez, bizkaieraren aldeko hautua egin da eta Elorrion ohiko diren «iruntza», «hegeran» edo «katamixarra» bezalako hitzak entzun daitezke kantuan. «Kanta alaia da, erritmo ugari dituena, eta, batez ere, partehartzea bultzatzen du», adierazi dute.
Atzoko aurkezpenean Manu Aurrekoetxea (Bizkaiko Ikastolen Elkartea), Iñaki Erroz (Txintxirri ikastola), Urko Igartiburu (musikaria) eta Mamen Rodrigo (ahotsa) izan ziren. Ekitaldi berean “Hitzak batzen gaitu” izeneko liburua ere aurkeztu zuten. Unai Elorriaga, Julen Gabiria, Gotzon Hermosilla, Miren Agur Meabe, Manu Etxeberria, Gontzal Mendibil, Igor Estankona, Leire Bilbao, Arrate Egaña eta Jon Arretxek ipuin bana idatzi dute eta Eleak eman du argitara.
|
