Leioako campuseko egoera salatu du IAk
LEIOA
Ikasle Abertzaleek prentsaurrekoa eman zuen atzo EHUko Leioako campusean, bertako hizkuntz egoera salatzeko. Ikasleen sindikatu horren arabera, bertako hizkuntza eskubideen urraketak «denbora handia» darama indarrean, eta unibertsitate horretako errektore Juan Ignacio Perezek euskararen normalizaziorako ahaleginak egiten urtebete daramala esan arren, «urratsik gabeko ahaleginak» direla azaldu zuen IAk. Horiek hala, ez daudela EHUren hizkuntza politika hori onartzeko prest adierazi zuen, eta Bolognako «mamu neoliberalak» arazoa areagotu baino ez duela egingo gehitu.
Egoera oker horren isla modura, Ikasle Abertzaleek urteak daramatzate fakultate bakoitzeko ikasketetako egoera konkretuak aztertzen, eta atzoko agerraldian azken datuak jakinarazi zituzten:
Zientzia Politikoetan eta Soziologian, 65 ikasgaitik 9 baino ez dira euskaraz, eta Kazetaritzan eta Publizitatean 101etik 37 soilik. Medikuntzan, lehen zikloa osorik euskaraz egin daitekeela dioten arren, Ikasle Abertzaleen datuek gezurtatu egiten dute hori, eta, gainera, fakultate horretan «irakasle euskaldunak kontratatzearen aurkako jarrera» dagoela salatu zuten atzoko agerraldian parte hartu zuten ordezkariek. Zientzietako bigarren zikloan, 331 ikasgaitik 79 baino ez dira euskaraz, eta azkenik, Zuzenbidean, hautazko gehienak gaztelaniaz dira.
Egoera hori izanik, IAk apirilaren 6an kalera ateratzeko dei egin zuen.
|
