Virtisun esku hartzeko eskatu dute berriro
GASTEIZ
Pastguren-Virtisu paper-lantokiko langileak Gasteizko Legebiltzarraren aurrean elkarretaratu ziren atzo, erakundeak euren egoeraren «benetako arduradunak» direla salatzeko. Zuzendaritzak ekoizpena Bartzelonako lantokira eramango duela jakinarazi zuen. Elkarretaratzea egiten zuten bitartean, Ana Aguirre Industria sailburuak Legebiltzarrean Lakuako Gobernuaren iritzia azaldu zuen.Alberto Valles ELAko eledunak azaldu zuenez, erakundeek esku hartzeko ordua da, haiek ekarri zituztelako enpresaburu horiek, laguntzak eman eta lurrak oparitu zizkieten «eta sei urte geroago, denok kalera bidali». Ekoizpena eramaten badute, 64 lanpostu galduko dira, baina proiektua ahulduko dela eta etorkizunik gabe geratuko dela salatu zuen. Izan daitezkeen irtenbideak direla-eta Vallesek ez zuen itxaropen berezirik erakutsi. «Guk enpresarekin negoziatzen dugu eta lantokia eramango duela berretsi du», adierazi zuen. Mobilizazioetan erakundeen eta EAJren erantzukizuna dela esaten jarraituko dute, «ezer lotu gabe» enpresaburu horien esku utzi zituztelako.
Bi aldeen eskuetan Hala ere, Lakuak ez zuen neurri handirik hartzeko asmoa erakutsi. Ana Agirre sailburuak lantokia eramatea ona ez dela onartu arren, arazo horren konponbidea bi aldeen eskuetan dagoela adierazi zuen Legebiltzarrean.
Hala ere, Gobernuak jarduera eta lanpostu gehien mantentzen duen edozein irtenbide bultzatuko duela esan zuen. Horretarako deslokalizatzen dituzten jarduera guztien jarraipena egingo duela esan zuen, «joko-arauak bete ditzaten». Beste alde batetik, arazo horietan legeek lan agintarien ahalmena mugatzen dutela adierazi zuen.
|
