30.000 euroko bermea jarri diete Bizkaiko lau presori
DONOSTIA
Askatasunak atzo jakinarazi zuenez, Ibon Goitia, Iker Legarra, Mikeldi Zenigaonandia eta Mikel Zenarruzabeitia preso bizkaitarrei 30.000 euroko bermea jarri diete. Diru-kopuru hori ordainduta, aske geratuko dira laurak. Ibon Goitia 2005. urteko maiatzaren 4an, Estatu espainoleko Auzitegian aurkeztu ondoren, atxilotu eta Soto del Realen kartzelaratu zuten. Iker Legarra joan den urteko martxoaren 24an atxilotu zuten Ermuan. Lau egunez Guardia Zibilaren esku inkomunikatuta egon ondoren, tratu txarrak salatu zituen. Soto del Realen sartu zuten, eta handik hilabete batera Alcala Mecora eraman zuten. Legarrarekin batera, Mikel Zenigaonandia atxilotu zuten. Hark ere tratu txarrak salatu zituen inkomunikatuta egon zen bitartean. Alcala Mecoko espetxean sartu zuten eta handik Aranjuezera eraman. Mikel Zenarruzabeitia, berriz, 2005. urteko apirilaren 25ean atxilotu zuten Estatu espainoleko Auzitegian aurkeztu zen egunean. Haren kasuan, berehala espetxeratu zuten Soto del Realen. Hilabete bat geroago, Aranjuezko espetxera lekuz aldatu zuten. Legarra eta Zenigaonandiarekin zerikusia zutela- koan, Gaizka Likona eta Jon Akarregi lekeitiarrak ere atxilotu zituzten. 12.000 euroko bermea ordaindu zuten kalera irten ahal izateko.
|
