Duela gutxi Gutunak sailean Gloria Dorronsorok izenpetutako protesta-gutun bat irakurri ahal izan dugu; eta antza denez, beste 136 pertsonen elkartasuna jaso du gutunak. Gutun horretan, Legorretako Udalak uda- lerriko Arau Subsidiarioak berraztertzeko garaian erabili duen sekretismoa salatzen da.

Ustez Udalak gaizki tratatu duenari eta herritar orori gauzak argi utzi asmoz, honako argitu nahi dugu:

1. Legorretako Udalak duela hiru bat urte ekin zion Arau Subsidiarioak berriz aztertzeari, notifikazio pertsonalak bidali, kontsulta ugari eta 2 erakusketa ostean, 11 iradokizun eta 35 alegazio jaso dira. Beraz, ezkutuan eta isilpean, EZ.

2. Azkenik, protesta horren atzean dagoenaren berri emateko asmoz, Udalak hau adierazi nahi du:

­Arau Subsidiarioak denbora jakin baterako (12 bat urtetarako) udalek prestatzen dituzten hirigintzako aurreikuspenak dira; ez dira, lur-jabe batek baino gehiagok uste duen bezala, Udalak «betiko» ematen duen loteria.

­Legorretako Udalak Arau Subsidiarioak berriz aztertzeari ekin dio, aurreko Arauetan (1986an onetsitakoetan) aurreikusten ziren hirigintzako aurreikuspen guztiak burututa zeudelako, Gloria Dorronsororena den zonako aurreikuspenak izan ezik.

­Oraingo honetan, Udalak apustu irmoa, ausarta eta asmo handikoa egin du, udalerriak lurzoru-erreserba bat izan dezan, eta lurzoru horietan herriari bidezkoak iruditzen zaizkion etorkizuneko ekipamenduak ipintzeko.

­Azkenik, argitu nahiko genuke Gloria Dorronsororen lurzoruak erreserbatzeko erabakiak, horietan ekipamendu publi- koak ipintzeko, ez dakarrela inolako kalte ekonomikorik lur-jabeentzat, bi aldeen artean hirigintzako hitzarmen baten bitartez, etxebizitzatarako balitz bezala baloratu eta ordaintzeko prest baitago Udala.

Xabier Iraola - Legorretako alkatea Udal osoaren izenean

Athleticzale errepresaliatuen aldeko gaua
Gure herrian badago kirolzale andana: alde batetik, tenisa, txirrindularitza edo arraunaren zaleak; beste aldetik, saskibaloia, futbola... gustukoa dutenak. Horietaz aparte bagaude talde nabarmen bat Athleticzale izatea aukeratu duguna, eta betikoek gu erruduntzat jo arren, Athleticzale izaten jarraitzen dugu, eta hala jarraituko dugu. Guri bost jazarpen saiakerek.

Gure lurraldeak pairatzen dituen bortizkeria, indarkeria eta errepresioa salatzeko bidea ematen digu Athleticek. Giza eskubideak eta euskal gatazkan murgildurik dauden bestelako eskubideak aldarrikatzen ditugu, bai Euskal Herrian bai atzerrian ere. Zergatik? Athleticek nortasun berezia duelako, gure lurraldearekin bat egiten duelako eta euskal kultura bultzatzen duelako.

Zaleak garen aldetik, jakinarazi nahi dugu Estatu espainiarraren zein frantsesaren eta Euskal Herrian dauden indar okupatzaileen indarkeria astebururo pairatzen dugun arren, ez dugula etsiko. Nahiz eta gure kideak kartzelaratu, isunez josi edo jipoitu, aurrera jarraituko dugu.

Bide horretan, gonbidapen berezia egin nahi genieke Euskal Herrian edo estatu espainiarrean errepresioaren kontra borrokatzen dutenei: datorren apirilaren 8an, gaueko 10etan, Alonsotegiko frontoian Herri Norte Taldeak antolatu duen kontzertuan parte hartzea. Alonsotegin Skarface, Deskontrol, Josu Distorsion y los del Puente Romano, Suspenders eta Txapelen musikarekin gozatzeko aukera izango da, eta han bilduko den dirua pasa den urtean Estatu espainiarrak HNTko kideei ezarritako isunei aurre egiteko bideratuko da. Izan ere, Racing- Athletic partidan soilik euskalduna izateagatik 15.000 euroko isuna ekarri genuen bueltan Bilbora.

Gaizka Aranaga - Herri Norte taldearen izenean