Genero indarkeriaren aurkako plangintzan adostu dira
Gasteizko Ganberak genero indarkeria izaten denean eman beharreko pausoak zehaztu zituen atzo, Emakume Batzordean. Eraso bat gertatzen denean, salaketa publiko bat eta adierazpen bat egitearen alde azaldu zen talde oro, PP izan ezik. Era berean, auzia gizartera dezatela eskatu diete erakundeei.
GASTEIZ
Genero indarkeriarekin zerikusia duten erasoei eman beharreko erantzunaren plangintzan adostu ziren atzo Gasteizko Ganberako Emakume eta Gazteria Batzordean. Ezker Abertzaleak taldeak aurkezturiko legez besteko proposamena hitzartzea proposatu zuten Lakuako Gobernua osatzen duten alderdiek. Emakumeen aurkako erasoak gertatzen direnean, salaketa publikoa egiteko eta eraso dioten pertsonari elkartasuna helarazteko konpromisoa hartzen du lehenik eta behin adostutako testuak. Haatik, salaketaren nondik norakoak ez dira zehazten. Era berean, erakunde-adierazpen bat egitearen alde agertu da. Bertan, emakumearen kontra egindako bortxakeria desagerrarazteaz gain, genero-indarkeria, ezberdintasunean oinarrituta dagoen gizarte baten adierazpena izanik, hainbat politikaren bidez ekidin eta zuzendu daitekeela esaten da. Hala, sexuen arteko berdintasuna eta emakumeen autonomia sustatuko litzateke. Era berean, plangintzak nabarmentzen du erasotzen dutenek jakin behar dutela legeak jarrera horiek zigortzen dituela eta gizarteak horrelako jokabiderik ez duela onartzen. Azkenik, auzia gizarteratzen jarrai dezatela eskatzen die erakundeei adostutako testuak.
PP bakarrik
Hirugarrenik, genero-indarkeriarekin zerikusia duten datuak, aldian behin, Emakume eta Gazteria Batzordera bidal ditzala eskatzen diote Lakuako Gobernuari. Ezker Abertzalearen eta hirukoaren aldeko botuez gain, PSErenak eta Aralarrenak ere lortu zituen hitzartutako testuak; PP bakarrik geratu zen. Ezker Abertzaleko legebiltzarkide Ane Auzmendik «nahiko pozik» azaldu zen lortutakoarekin. Aurrerapauso bat dela nabarmendu zuen, «txikia» bada ere. «Pauso bat da, eta horregatik babestu dugu hitzartutako testu hori», jakinarazi zuen. Emakumearen aurkako eraso bat gertatzen denean, Gasteizko Legebiltzarrak adierazpen bat egin behar duela eta, gainera, kalera irten behar duela nabarmendu zuen Auzmendik. Alde horretatik, bere taldeak adierazpen «zehatzagoa» nahi zuen arren, gainerako alderdiek ez zuten «ezer zehatzik» hitzartu nahi, eta, ondorioz, hitzartutako testua «oso orokorra» dela adierazi zuen Auzmendik. Horiek hala, Ezker Abertzalearentzat «nahikoa ez dela» azaldu zuen, eta hemendik aurrera, zehaztasun handiagoa izateko lan egingo duela esan zuen legebiltzarkideak.
|
