«Kanut» aurkeztuko dute Garaziko ikasleek
DONIBANE GARAZI
Urtero legez, Garaziko lizeoko antzerki tailerreko ikasleek ikasturte bukaerako antzezlana aurkeztuko dute Antton Luku irakasle eta zuzendariaren laguntzarekin. «Kanut» gaur estreinatuko dute Ispurako Faustin Bentaberri gelan, arratseko bederatzietan, eta bihar azken aldiz antzeztuko dute toki eta ordu berean.
Kanutoak erretzeari buruz mintzatzen den obra honek «topiko eta klitxeetan» ez erortzeko entsegua egin duela nabarmendu zuen Lukuk. «Orokorki droga hitzak ze sartze ekartzen duen begiratu dugu. Munduko mapan drogei ematen zaien tratamendua, finantza aldea, droga ezberdinei buruz... mintzatu gara, drogek ukitzen dituzten gai guztiak aipatzen ditu», azaldu zuen zuzendari-irakasleak.
Hamabigarren aldia da lizeoko gazteek antzezlana egiten dutela ikasturtearen bukaeran. «Ikasle eta gurasoez gain, Iparraldeko antzerkizale publiko fidela ere joaten da, zeren eta nire ustez bada estilo berezi bat Garaziko lizeokoa, eta etortzen dira ikusterat zer pentsatua izan den aurten», esan zuen Lukuk.
|
