Kanpotik
Haizeak jotzen duenean pizten diren alarmak
Gaizka Lasa
Leringo aldapa pikoa eta tentsioa izan ziren atzoko bi protagonistak. Lehena erabakiorra izan zen, bigarrenak ez zuen ondoriorik ekarri. Baina, txirrindulariek bazekiten azkeneko maldak baino min handiagoa egin zezakeela haizeak eragindako tentsioak. Izan ere, saihetsetik jo zuen une batzuetan, eta alarma guztiak piztu ziren: "Adi", "erne", "kontuz" eta "argi" hitzak hizkuntza desberdinetan etengabe belarria zigortzen. Aurrekoaren ipurdia normalean baino gertuago, aldamenekoaren ukondoa gainean, atzekoaren eskua bultzakaŠ horri deitzen zaio tentsioa! Eta denak aurrerago joan nahi, eta noski, azkarrago. Haizea irentsi nahi ez duenak zalaparta hori irentsi behar, errepide bazterreko lurra edo belarra ez denean.Azkenean haizeak ez zuen lasterketa puskatu, bakarrik ezin baitu. Txirrindulariek apurtu dezakete lasterketa haizearen laguntzaz eta ez alderantziz. Baina hori ez da hain erraza. Indarra behar da, eta indarrean iraun. Talde bat topera jarri eta kilometro batzuk errelebutan egin arte ez baita tropela tentsiotik harago joaten. Teoria argi dago, gaitasuna behar izaten da, ordea. -
|
