SAN FRANCISCO

Sistemak GPS teknologiaren bidez funtzionatzen du; era horretan, gurasoek mapa batean ikus dezakete non dauden euren seme-alabak. Gainera, mugikorra programa daiteke gurasoei mezu bat automatikoki bidaltzeko haurrak etxera edo eskolara ondo heldu diren jakin dezaten.

Sprintek aurreko asteko ostegunean merkaturatu zuen sistema elektroniko berria, baina ez da ideia horren gainean pentsatu duen enpresa bakarra. Izan ere, Disney konpainiak nerabeen gurasoentzako telefonia mugikorreko zerbitzua ekainean merkaturatuko duela esan zuen.

Zerbitzua 10-15 urte dituzten gazteen gurasoentzat pentsatuta dago. Sistema berri horren bidez, gurasoek mugikorraren gastua kontrola dezakete. Horrez gain, Disney Mobileren bidez, gurasoek jakin dezakete beren seme-alabak norekin hitz egiten ari diren eta zeintzuk diren bidaltzen dituzten mezuak eta argazkiak.

Sprint enpresaren zerbitzua bezala, Disney Mobilerenak GPS edukiko du, hortaz, teknologia berriaren bidez, gurasoek euren seme-alabak une oro non dauden jakin dezakete.

Merkaturako ideia berriak

Sprint eta Disney enpresak ez dira etekin ekonomikoak bilatzeko horrelako ideia berritzaileak izan dituzten bakarrak. Gainera, telefonia mugikorraren merkatua gero eta zabalagoa da, eta gero eta gehiago dira zerbitzu horretaz baliatuz ideia berriak merkaturatzen saiatzen direnak. Mugikorrak inbertsio seguruak dira, bezeria zabala baitute eta nerabe eta gazteek merkatuaren zati handi bat osatzen dutelako. Beraz, asko dira talde horretan pentsatzen beren produktuak kaleratzen dituzten enpresak. Musikaren merkatua izan zen sakelako telefonoen indarraz jabetu zen lehenengoa.

Orain dela gutxi, Sprint eta Verizon izeneko enpresek Internetetik musika jaistea eta mugikorrean entzutea ahalbidetu zuten.

Beraz, norbaitekin hitz egitea segapotoen funtziorik sinpleena da; enpresak aspaldi jabetu ziren horretaz.